Xitoy rahbariyati 15-aprel kuni Isroil rasmiylariga murojaat qilib, o‘t ochishni darhol to‘xtatishga va tinchlikka erishishga chaqirdi. Bu haqda Anadolu nashri Yaqin Sharq manbalariga asoslanib, xabar berdi.
Manbada aytilishicha, Pekin rasmiylari Isroil va Eron hujumlaridan keyin Yaqin Sharqda keskinlik kuchayishidan xavotir bildirgan. Masʼullarni urushga yetaklovchi har qanday xatti-harakatni to‘xtatishga chaqirgan.
Xitoy Tashqi ishlar vazirligi bayonotida aytilishicha, dushanba kuni Xitoyning Yaqin Sharq bo‘yicha maxsus vakili Chjay Jun Isroilning Xitoydagi elchisi Irit Ben-Abba Vitale bilan uchrashgan. Unda Yaqin Sharq mojarosi yuzasidan Xitoyning nuqtai nazari tinglangan.
“Tomonlar Yaqin Sharqdagi vaziyat yuzasidan fikr almashdilar. Keskinlikni tugatish borasida o‘z mulohazalarini bildirdilar”, — deyiladi rasmiy xabarda.
Irit Ben-Abba Vitale Xitoy vakilini o‘tgan hafta oxiridagi Eronning Isroilga qarshi harbiy hujumi bilan bog‘liq vaziyat bilan tanishtirgan. G‘azodagi mojaro borasida Isroilning pozitsiyasi va xavotirlarini maʼlum qilgan.
O‘z navbatida Xitoy rasmiysi Chjay Xitoyning G‘azo mojarosi bo‘yicha pozitsiyasiga batafsil to‘xtalib, mintaqaviy taranglikning hozirgi kuchayib borayotganidan chuqur xavotirda ekanini aytgan, mojarolar va qon to‘kishlar hech kimning manfaatiga xizmat qilmasligini taʼkidlagan.
Uchrashuvda Xitoy rasmiysi isroillik hamkasbidan tinchlikka erishish uchun barcha resurslarni safarbar qilishni so‘ragan.
Izoh (0)