Xitoy rahbari Si Szinpin Pekinda Germaniya kansleri Olaf Shols bilan uchrashdi. Suhbat chog‘ida Ukrainadagi harbiy mojaro va uni hal qilish usullari haqida fikr almashildi.
Ikkala tomon ham yadro qurolidan foydalanish yoki yadroviy obyektlarga hujum qilishning oldini olish bo‘yicha BMT Nizomining tamoyillariga sodiqligini e’lon qildi.
Si Szinpin Ukrainadagi mojaroni hal qilish uchun to‘rtta tamoyilga amal qilish kerakligini ta’kidladi.
Uning fikriga ko‘ra, hozirgi vaziyatda mojaro avj olishi yoki nazoratdan chiqib ketishining oldini olish zarur. Shu maqsadda Xitoy rahbari quyidagi tamoyillarga amal qilishni taklif qildi:
- tinchlikka erishish va g‘arazli manfaatlarni ko‘zlamaslik,
- vaziyatni yumshatish va “olovga moy quymaslik”,
- tinch muzokaralar uchun shart-sharoit yaratish va mojarolarning yanada kuchayishiga yo‘l qo‘ymaslik;
- mojaroning global iqtisodiyotga salbiy ta’sirini minimallashtirish va global sanoat ta’minot zanjirlarining barqarorligini buzmaslik.
“Xitoy inqirozni tinch yo‘l bilan hal qilishga qaratilgan barcha saʼy-harakatlarni qo‘llab-quvvatlaydi. Shuningdek, Rossiya va Ukraina tomonidan tan olingan, barcha tomonlarning teng ishtiroki va barcha tinch yo‘llarning adolatli muhokamasi o‘tkaziladigan xalqaro tinchlik konferensiyasi chaqirilishini qo‘llab-quvvatlaydi. Biz barcha tomonlar, jumladan, Germaniya bilan ham hamkorlikni qo‘llab-quvvatlashga tayyormiz”, — dedi Si Szinpin Olaf Shols bilan uchrashuvda.
Izoh (0)