“Sport” telekanali Qatardagi Osiyo Kubogini namoyish etadi

Qatarda o‘tkaziladigan Osiyo Kubogi U23 bahslari “Sport” telekanali tomonidan namoyish etiladigan bo‘ldi. 

O‘FA matbuot va media xizmati rahbari Davron Fayziyev telegramdagi kanalida ma’lum qilishicha, Qatarda o‘tkaziladigan Osiyo Kubogi U23 va futzal bo‘yicha Osiyo Kubogi “Sport” telekanalida translyatsiya qilinadi. Ushbu xabar telekanal direktori Zohid Karimov tomonidan ham tasdiqlandi. 

Parij-2024 Olimpiadasiga yo‘llanma beruvchi turnir Qatarda 15-apreldan 3-mayga qadar davom etadi. Tailandda o‘tadigan turnir esa 17-apreldan 28-aprelga qadar davom etadi.

Bugun Toshkent vaqti bilan 18:00 da Avstraliya — Iordaniya o‘yini bilan turnirga start beriladi. Shu bilan birga, Qatar - Indoneziya bahsi ham bugun bo‘lib o‘tadi. Uchrashuv 20:30 da boshlanadi.

Eslatib o‘tamiz, Timur Kapadze shogirdlari musobaqadagi ishtirokini 17-aprel kuni Malayziyaga qarshi o‘yin bilan boshlaydi. Uchrashuv Ar-Rayyandagi Khalifa International stadionida bo‘lib o‘tadi. O‘yinning boshlanish vaqti: 18:00.

Ikkinchi turdagi o‘yin esa 20-aprel kuni Kuvaytga qarshi bo‘lib o‘tadi. Ushbu o‘yin mezboni Al-Vakradagi Al-Janoub stadioni bo‘lishi ko‘zda tutilgan. O‘yinning boshlanish vaqti: 20:30.

Guruh bosqichidagi so‘nggi o‘yin Vyetnamga qarshi bo‘lib o‘tadi. Bahs 23-aprel sanasida yana Ar-Rayyandagi Khalifa International stadionida o‘tkaziladi. O‘yinning boshlanish vaqti: 20:30.