“Isroil xavfsizligini himoya qilish uchun barcha imkoniyatlarni ishga solish niyatidamiz” — Bayden

AQSH prezidenti Jo Bayden eronliklar Isroilga istalgan kunda “jiddiy hujum” bilan tahdid qilayotgani haqida ogohlantirdi. Bu haqda BBC xabar berdi.

AQSH rasmiylariga ko‘ra, Tehron 1-aprel kuni Isroil tomonidan Eronning Suriyadagi konsullik binosiga uyushtirilgan hujum va buning oqibatida halok bo‘lgan Eronning yuqori martabali harbiy xizmatchilari uchun javob qaytara oladi.

Ular Isroilga jiddiy zarba berish bilan tahdid qilmoqda. Netanyaxuga aytganimdek, bizning Isroil xavfsizligini Eron tahdidlaridan himoyalash bo‘yicha sodiqligimiz qat’iydir. Biz Isroil xavfsizligini ta’minlash uchun barcha imkoniyatlarni ishga solish niyatidamiz, — dedi AQSH prezidenti.

Konsullikda halok bo‘lganlar orasida Quds kuchlarining brigada generali Muhammad Rizo Zahidiy bo‘lgan. Uning o‘rinbosari general Muhammad Hodi Hoji Rahimiy ham halok bo‘lgan.

Eron oliy rahnamosi Oyatulloh Ali Xomanaiy 10-aprel kuni ramazon oyi tugashi munosabati bilan qilgan chiqishida Isroil Eron konsulligiga hujum qilgani uchun jazolanishini aytgan.

Yovuz tuzum bu borada xatoga yo‘l qo‘ydi, u jazosini oladi. Har qanday davlatdagi konsullik va elchixonalar ularga tegishli bo‘lgan mamlakat hududi hisoblanadi. Ular bizning konsullikka hujum qilganda, demak ular bizning hududimizga hujum qilishgan. Bu umumbashariy qonun, — taʼkidlagan Xomanaiy.

AQSH davlat departamenti maʼlumotlariga ko‘ra, Entoni Blinken Isroil mudofaa vaziri Yoav Gallant bilan bog‘lanib, agar Eron tomonidan hujumga uchrasa, Vashington Isroilni qo‘llab-quvvatlashiga ishontirgan.