HAMAS Qohiradagi muzokaralarda Isroilning o‘t ochishni to‘xtatish bo‘yicha taklifini rad etdi. Isroil bosh vaziri Binyamin Netanyaxu esa falastinliklar uchun so‘nggi boshpana bo‘lgan Rafah shahriga bostirib kirish sanasini belgiladi. Bu haqda Reuters xabar berdi.
Isroil va HAMAS muzokaralar o‘tkazish uchun 7-aprel kuni Misrga guruhlar yubordi, ular orasida Qatar va Misr vositachilari hamda AQSH markaziy razvedka boshqarmasi direktori Uilyam Berns ham bor edi.
“Misr tomoni bizni xabardor qilgan muzokaralardagi Isroilning so‘nggi takliflarini rad etamiz. HAMAS siyosiy byurosi yig‘ilib, shunday qarorga keldi”, — dedi HAMASning yuqori martabali mulozimi Ali Baraka.
HAMASning yana bir rasmiysi muzokaralarda hech qanday muvaffaqiyatga erishilmaganini tasdiqladi.
“Bosqinchilarning (Isroil) pozitsiyasida hech qanday o‘zgarish yo‘q, shuning uchun Qohira muzokaralarida yangilik yo‘q. Hali hech qanday taraqqiyot yo‘q”, — dedi ismini oshkor qilishni istamagan HAMAS rasmiysi.
Isroilning o‘t ochishni to‘xtatish borasidagi taklifining tafsilotlari ma’lum emas. 8-aprel kuni Netanyaxu Qohiradagi muzokaralar haqida batafsil hisobot olganini aytdi.
“Biz o‘z maqsadlarimizga erishish, birinchi navbatda, barcha garovga olinganlarni ozod qilish va HAMAS ustidan to‘liq g‘alabaga erishish uchun doimo harakat qilamiz. G‘alabaga erishishda Rafahga kirish va u yerdagi terrorchilar batalyonlarini yo‘q qilish kerak. Bu sodir bo‘ladi, sana belgilandi”, — dedi u.
Binyamin Netanyaxu Rafahga bostirib kirish sanasini ma’lum qilmadi. Rafah isroilliklarning tinimsiz bombardimonlari natijasida ko‘chirilgan falastinlik tinch aholi uchun so‘nggi boshpanadir.
“Bu, shuningdek, HAMAS jangchilarining oxirgi muhim tayanchidir”, — deydi Isroil.
Bir milliondan ortiq falastinlik G‘azo janubidagi Rafahda nochor ahvolda, yetarli oziq-ovqat, suv va boshpanasiz yashamoqda, xorijiy hukumatlar va tashkilotlar Isroilni qon to‘kilishidan ogohlantirib, Rafahga bostirib kirmaslikka chaqirmoqda.
Izoh (0)