Nyu-Yorkdagi metroda janjal otishmaga aylanib ketdi (video)

Nyu-York metrosining gavjum bekatida ikki erkak o‘rtasidagi janjal natijasida otishma sodir bo‘ldi. Bu haqda ABC News xabar berdi.

Hodisa 32 yoshli erkakning Nostrand prospektidagi poyezdga o‘tirgani va unga 36 yoshli erkakning “tajovuzkor va provokatsion harakat” bilan yaqinlashganidan so‘ng boshlangan, — dedi Nyu-York politsiyasining tranzit bo‘limi boshlig‘i Maykl M. Kemper.

Erkaklar o‘rtasida tortishuv jismoniy janjalga aylangan. 36 yoshli erkak o‘tkir buyumni ko‘rsatib, keyin esa uni yerga qo‘ygan. Janjal davom etgach, tajovuzkor erkak paltosidan qurol olib, tahdidli tarzda ikkinchisiga yaqinlashgan. 32 yoshli shaxs janjalni davom ettirib, 36 yoshli erkakdan qurolni olib, unga qarata bir necha marta o‘q uzgan. 

Hodisa oqibatida boshqa hech kim jabrlanmagan. Poyezd kelgan stansiyada bir nechta politsiyachi bo‘lgan va voqea joyiga yetib kelgan. Politsiya guvohlar bilan suhbatlashish hamda qo‘shimcha dalillar to‘plash uchun stansiyada qolgan. Hozirda tergov davom etmoqda.

Politsiya o‘q yegan 36 yoshli erkakning ahvoli og‘ir ekanini bildirgan. O‘q otgan 32 yoshli shaxs qo‘lga olingan.