Qozog‘istonning oltin zaxiralari necha yilga yetadi?

Qozog‘iston oltin zaxiralari yana 25 yilga yetadi. Bu haqda respublika Sanoat va qurilish vazirligiga tayanib, Inbusiness.kz xabar berdi.

Vazirlikning Geologiya qo‘mitasi raisi Yerlan Akbarovning so‘zlariga ko‘ra, Qozog‘istonda ayrim foydali qazilmalarni to‘ldirish darajasi juda past.

“Asosiy foydali qazilmalar bo‘yicha oltin, mis, qo‘rg‘oshinning o‘rtacha ta’minoti taxminan 40 yilni tashkil etadi. Masalan, hozir bizning balansimizda 2,3 ming tonnaga yaqin oltin bor. Mamlakatda yiliga 90 tonna oltin qazib olinadi, demak, ta’minot taxminan 24-25 yilni tashkil qiladi. Umuman olganda, Qozog‘iston balansida 130 dan ortiq turdagi foydali qazilmalar mavjud”, — dedi u.

O‘z navbatida, Geologiya qo‘mitasi raisi o‘rinbosari vazifasini bajaruvchi Qanat Yeruboyevning aytishicha, oltin zaxiralari haqidagi maʼlumotlar muntazam yangilanib turadi.

“Zaxiralarimiz yer ostidan metallarni qidiruvchilar tomonidan doimiy ravishda to‘ldirilib boriladi, yaʼni metallar qazib olinsa, bir vaqtning o‘zida zaxiralarimiz ham yangilanadi”, — deya xulosa qildi u.

Taʼkidlanishicha, o‘tgan yili Qozog‘istonda 350 milliard dollarlik foydali qazilma zaxiralari prognoz qilingan 78 ta istiqbolli obyektlar aniqlangan.