Қозоғистоннинг олтин захиралари неча йилга етади?

Қозоғистон олтин захиралари яна 25 йилга етади. Бу ҳақда республика Саноат ва қурилиш вазирлигига таяниб, Inbusiness.kz хабар берди.

Вазирликнинг Геология қўмитаси раиси Ерлан Акбаровнинг сўзларига кўра, Қозоғистонда айрим фойдали қазилмаларни тўлдириш даражаси жуда паст.

“Асосий фойдали қазилмалар бўйича олтин, мис, қўрғошиннинг ўртача таъминоти тахминан 40 йилни ташкил этади. Масалан, ҳозир бизнинг балансимизда 2,3 минг тоннага яқин олтин бор. Мамлакатда йилига 90 тонна олтин қазиб олинади, демак, таъминот тахминан 24-25 йилни ташкил қилади. Умуман олганда, Қозоғистон балансида 130 дан ортиқ турдаги фойдали қазилмалар мавжуд”, — деди у.

Ўз навбатида, Геология қўмитаси раиси ўринбосари вазифасини бажарувчи Қанат Ерубоевнинг айтишича, олтин захиралари ҳақидаги маълумотлар мунтазам янгиланиб туради.

“Захираларимиз ер остидан металларни қидирувчилар томонидан доимий равишда тўлдирилиб борилади, яъни металлар қазиб олинса, бир вақтнинг ўзида захираларимиз ҳам янгиланади”, — дея хулоса қилди у.

Таъкидланишича, ўтган йили Қозоғистонда 350 миллиард долларлик фойдали қазилма захиралари прогноз қилинган 78 та истиқболли объектлар аниқланган.