Ukraina razvedkasi 2024-yilda Rossiyaning kontinental hududini anneksiya qilingan Qrim bilan bog‘laydigan deyarli 19 kilometrlik inshoot — Qrim ko‘prigini uchinchi bor portlatishni rejalashtirmoqda. Bu haqda razvedkaning yuqori martabali vakillariga tayanib, The Guardian xabar berdi.
Razvedka yaqin kelajakda ko‘prikni yaroqsiz holga keltirishlari mumkinligiga ishonmoqda.
“Biz buni 2024-yilning birinchi yarmida qilamiz”, — dedi razvedka xizmati amaldorlaridan biri.
Manbalarga ko‘ra, Bosh razvedka boshqarmasi boshlig‘i Kirill Budanovda “bu maqsadga erishish uchun mablag‘ning katta qismi” allaqachon mavjud. Hujum dronlar yordamida amalga oshirilishi mumkin.
“Ko‘prikka hujum Rossiyaning Qora dengizdagi mavjudligini minimallashtirish bo‘yicha Vladimir Zelenskiy tomonidan tasdiqlangan rejaning bir qismidir”, — deyiladi xabarda.
Harbiy konflikt boshlanganidan keyin Ukraina tomonidan Qrim ko‘prigida ikkita portlash sodir etildi. 2022-yil 8-oktyabr kuni ko‘prikdan o‘tayotgan yuk mashinasi portlatildi, temir yo‘lga zarar yetdi va magistralning bir necha qismi vayron bo‘ldi. Ikkinchi portlash 2023-yil 17-iyulda sodir bo‘ldi.
Birinchi portlashda to‘rt kishi halok bo‘lgandi, o‘shanda ko‘prikning avtomobil qismidagi oraliqlardan biri qisman qulab tushgan. Hodisadan ko‘p o‘tmay Rossiya FXX ushbu ishda gumon qilingan 12 kishidan sakkiz nafari hibsga olingani haqida xabar berdi.
Ko‘prikda sodir bo‘lgan ikkinchi portlash oqibatida mashinada bo‘lgan er-xotin halok bo‘ldi, ularning 14 yoshli qizi yaralandi. Ko‘prikning avtomobil qismi ham shikastlandi.
Izoh (0)