Anneksiya qilingan Qrimni Krasnodar o‘lkasi bilan bog‘lovchi Qrim ko‘prigi to‘liq tiklandi. Bu haqda Rossiya bosh vaziri o‘rinbosari Marat Xusnullin ma’lum qildi.
“Butun ish uch oydan kamroq vaqt oldi. Shu vaqt ichida ikkita shikastlangan oraliq demontaj qilinib, yangilari o‘rnatildi”, — deb yozadi Xusnullin Telegram’da.
Uning so‘zlariga ko‘ra, ko‘prikni tiklash ishlari belgilangan muddatdan 18 kun oldin yakunlangan. Avtomobillar harakati barcha to‘rt qismda ham ochiq.
Rossiya qo‘shinlarining Ukrainaga keng ko‘lamli bosqini boshlanganidan beri Qrim ko‘prigida ikkita portlash sodir bo‘ldi — 2022-yil 8-oktyabrda va 2023-yil 17-iyulda. Portlashlarni Ukraina xavfsizlik xizmati amalga oshirgan.
Birinchi portlashda to‘rt kishi halok bo‘lgandi, o‘shanda ko‘prikning avtomobil qismidagi oraliqlardan biri qisman qulab tushgan. Hodisadan ko‘p o‘tmay Rossiya FXX ushbu ishda gumon qilingan 12 kishidan sakkiz nafari hibsga olingani haqida xabar berdi.
Ko‘prikda sodir bo‘lgan ikkinchi portlash oqibatida mashinada bo‘lgan er-xotin halok bo‘ldi, ularning 14 yoshli qizi yaralandi. Ko‘prikning avtomobil qismi ham shikastlandi.
Izoh (0)