Украина разведкаси 2024 йилда Россиянинг континентал ҳудудини аннексия қилинган Қрим билан боғлайдиган деярли 19 километрлик иншоот — Қрим кўпригини учинчи бор портлатишни режалаштирмоқда. Бу ҳақда разведканинг юқори мартабали вакилларига таяниб, The Guardian хабар берди.
Разведка яқин келажакда кўприкни яроқсиз ҳолга келтиришлари мумкинлигига ишонмоқда.
“Биз буни 2024 йилнинг биринчи ярмида қиламиз”, — деди разведка хизмати амалдорларидан бири.
Манбаларга кўра, Бош разведка бошқармаси бошлиғи Кирилл Будановда “бу мақсадга эришиш учун маблағнинг катта қисми” аллақачон мавжуд. Ҳужум дронлар ёрдамида амалга оширилиши мумкин.
“Кўприкка ҳужум Россиянинг Қора денгиздаги мавжудлигини минималлаштириш бўйича Владимир Зеленский томонидан тасдиқланган режанинг бир қисмидир”, — дейилади хабарда.
Ҳарбий конфликт бошланганидан кейин Украина томонидан Қрим кўпригида иккита портлаш содир этилди. 2022 йил 8 октябрь куни кўприкдан ўтаётган юк машинаси портлатилди, темир йўлга зарар етди ва магистралнинг бир неча қисми вайрон бўлди. Иккинчи портлаш 2023 йил 17 июлда содир бўлди.
Биринчи портлашда тўрт киши ҳалок бўлганди, ўшанда кўприкнинг автомобиль қисмидаги оралиқлардан бири қисман қулаб тушган. Ҳодисадан кўп ўтмай Россия ФХХ ушбу ишда гумон қилинган 12 кишидан саккиз нафари ҳибсга олингани ҳақида хабар берди.
Кўприкда содир бўлган иккинчи портлаш оқибатида машинада бўлган эр-хотин ҳалок бўлди, уларнинг 14 ёшли қизи яраланди. Кўприкнинг автомобиль қисми ҳам шикастланди.