Namangan viloyatidagi Axsikentda Qoraxoniylar davriga mansub turar joy inshootlari topildi. Bu haqda viloyat hokimligi xabar berdi.
Maʼlum qilinishicha, ular o‘ziga xos qurilish uslubiga ega bo‘lib, asosan sinchli uylar xom va pishiq g‘ishtlar bilan qurilgan. Axsikent arxeologiya parki ilmiy xodimi, arxeolog-olim Shukrullo Nasriddinovga ko‘ra, 11-12 asrlarda Axsikent aholi turar joylari devoriy suratlar bilan bezatilgani aniqlangan.
“Aholi turar joylarida oshxona, yuvinish xonasi, isitish sandallari, supalari va maxsus xo‘jalik o‘ralari mavjud bo‘lgan. Aholi zich yashagani uchun shaharda ikki qavatli uylar qurilgan. Uylarning yerto‘la qismi asosan pishiq g‘ishtdan qurilgan va oziq ovqat omborlari vazifasini o‘tagan. Shuningdek, alohida yerosti inshootlari ham qurilgan. Aholi turar joylari qoldiqlaridan devoriy surat namunalari va o‘yma ganchli naqshlar ham topilgan. Demak 11-12 asrlarda Axsikent aholi turar joylari devoriy suratlar bilan bezatilgan”, — deydi Shukrullo Nasriddinov.
Shuningdek, topilgan o‘nga yaqin sirli sopol idishlarda yozuvlar borligi aniqlandi. Ular naqshga o‘xshatib yozilgan hikmatli so‘zlar bo‘lib, “Fikr aytishga shoshilma”, “Baxt boylikda emas”, “Mehnat insonni ulug‘laydi” iboralari ifodalangan.
Izoh (0)