Isroilning Rafahdagi binoga bergan zarbasi oqibatida kamida 14 nafar falastinlik halok bo‘ldi — CNN

Isroil havo hujumi oqibatida Rafah shahridagi bino ichida boshpana topgan kamida 14 nafar falastinlik halok bo‘ldi. Bu haqda CNN nashri xabar berdi.

Rafahdagi Abu Yusuf an-Najjar kasalxonasi tomonidan tarqatilgan qurbonlar ro‘yxatiga ko‘ra, halok bo‘lganlar orasida to‘rt nafar ayol va yetti bola ham bor.

G‘azo fuqarolik mudofaasi maʼlumotlariga ko‘ra, favqulodda yordam xodimlari Al-Nasr shimoli-sharqidagi portlab ketgan bino vayronalari ostidan bir qancha qurbonlarni topishgan. Qutqaruv brigadalari hozirda hududda faol ishlamoqda.

Manbaga ko‘ra, qutqaruvchilar vayronalar ostidan bir ayolni qutqarib olishgan. Bino vayronalari ostida yana odamlar qolib ketgan bo‘lishi mumkinligi aytilgan.

CNN so‘rovlaridan so‘ng Isroil mudofaa kuchlari zarba sanasi, vaqti va joyi haqidagi maʼlumotlarni taqdim etgan. Biroq hujum sababi haqidagi savollarni Tel-Aviv rasmiylari javobsiz qoldirgan.