Toshkent shahar Yashnobod tumanida yashovchi 33 yoshli R.D. (ayol) ariza bilan murojaat qilib, Telegram’da “Man baxtlimaaannn” nomli profil egasi, R.D.ning fotosuratlarini haqoratli yozuvlar bilan ijtimoiy tarmoqlarga joylashtirganligini maʼlum qilgan. Bu haqda Kiberxavfsizlik markazi matbuot xizmati xabar berdi.
Maʼlum qilinishicha, o‘tkazilgan tezkor-qidiruv tadbirlari natijasida mazkur jinoyatni Toshkent shahar Sergeli tumanida yashovchi 30 yoshli X.F. (ayol) sodir etganligi aniqlangan.
Gumonlanuvchi sifatida tergov organlariga jalb etilgan X.F. jabrlanuvchi R.D.ning fotosuratlarini Telegram’dagi “Man baxtlimaaannn” nomli profilda, shuningdek, Instagram’dagi “allohim_0101” akkaunti orqali R.D.ni turli so‘zlar bilan haqoratlab, kamsitgan. Ushbu akkauntda uning fotosuratlarini haqoratli yozuvlar bilan joylashtirganligi aniqlangan va tegishli tartibda hujjatlar rasmiylashtirilgan.
Mazkur holat yuzasidan JKning 140-moddasi 2-qismi (nashr qilish yoki boshqacha usulda ko‘paytirilgan tarzda, shu jumladan ommaviy axborot vositalarida, telekommunikatsiya tarmoqlarida yoki internet jahon axborot tarmog‘ida joylashtirish orqali haqorat qilish) bilan jinoyat ishi qo‘zg‘atilib, X.F.ning sodir etilib, fosh etilmay qolgan boshqa shu turdagi jinoyatlarga aloqadorligi yuzasidan tezkor-surishtiruv ishlari olib borilmoqda.
Izoh (0)