Тошкент шаҳар Яшнобод туманида яшовчи 33 ёшли Р.Д. (аёл) ариза билан мурожаат қилиб, Telegram’да “Ман бахтлимаааннн” номли профил эгаси, Р.Д.нинг фотосуратларини ҳақоратли ёзувлар билан ижтимоий тармоқларга жойлаштирганлигини маълум қилган. Бу ҳақда Киберхавфсизлик маркази матбуот хизмати хабар берди.
Маълум қилинишича, ўтказилган тезкор-қидирув тадбирлари натижасида мазкур жиноятни Тошкент шаҳар Сергели туманида яшовчи 30 ёшли Х.Ф. (аёл) содир этганлиги аниқланган.
Гумонланувчи сифатида тергов органларига жалб этилган Х.Ф. жабрланувчи Р.Д.нинг фотосуратларини Telegram’даги “Ман бахтлимаааннн” номли профилда, шунингдек, Instagram’даги “аллоҳим_0101” аккаунти орқали Р.Д.ни турли сўзлар билан ҳақоратлаб, камситган. Ушбу аккаунтда унинг фотосуратларини ҳақоратли ёзувлар билан жойлаштирганлиги аниқланган ва тегишли тартибда ҳужжатлар расмийлаштирилган.
Мазкур ҳолат юзасидан ЖКнинг 140-моддаси 2-қисми (нашр қилиш ёки бошқача усулда кўпайтирилган тарзда, шу жумладан оммавий ахборот воситаларида, телекоммуникация тармоқларида ёки интернет жаҳон ахборот тармоғида жойлаштириш орқали ҳақорат қилиш) билан жиноят иши қўзғатилиб, Х.Ф.нинг содир этилиб, фош этилмай қолган бошқа шу турдаги жиноятларга алоқадорлиги юзасидан тезкор-суриштирув ишлари олиб борилмоқда.
Изоҳ (0)