Toshkent viloyatida 1-apreldan 2023-2024-yildagi isitish mavsumi yakunlanadi. Bu haqda viloyat hokimining tegishli farmoyishida so‘z boradi (hujjat matni “Daryo” tahririyatida mavjud).
Farmoyish bilan viloyat Qurilish va uy-joy kommunal xo‘jaligi bosh boshqarmasi hamda “Issiqlik manbai” ishlab chiqarish boshqarmasining viloyatdagi markazlashgan issiqlik ta’minotidan foydalanuvchi iste’molchilarni issiqlik bilan ta’minlash isitish mavsumini 1-aprel soat 09:00 da yakunlash to‘g‘risidagi taklifi ma’qullangan.
Viloyat Iqtisodiyot va moliya boshqarmasi byudjet tashkilotlarini 2023/2024-yillardagi isitish mavsumida iste’mol qilingan issiqlik energiyasi uchun to‘lovlarni o‘rnatilgan tartibda amalga oshirish choralarini ko‘radi.
Shu bilan birga viloyat Qurilish va uy-joy kommunal xo‘jaligi bosh boshqarmasi hamda “Issiqlik manbai” ishlab chiqarish boshqarmasi, shahar va tuman hokimliklari bilan birgalikda isitish mavsumi yakunlangani munosabati bilan 2024/2025-yillardagi isitish mavsumiga tayyorgarlik ko‘rish ishlari amalga oshirilishini ta’minlaydi.
Eslatib o‘tamiz, poytaxtda 6-noyabrdan isitish mavsumi boshlangan. 2023-yil yakuniga ko‘ra, yuridik shaxslar uchun issiqlik taʼminoti xizmatlari tariflari 1,5 baravarga, budjet muassasalari uchun esa 1,6 barobarga oshgandi. O‘shanda aholi uchun tarif o‘zgarishsiz qolgandi, Veolia Energy kompaniyasining issiqlik taʼminoti uchun bazaviy tarifi 67,3 foizga — 664 465 so‘mga oshgan.
Izoh (0)