Тошкент вилоятида 1 апрелдан 2023-2024 йилдаги иситиш мавсуми якунланади. Бу ҳақда вилоят ҳокимининг тегишли фармойишида сўз боради (ҳужжат матни “Дарё” таҳририятида мавжуд).
Фармойиш билан вилоят Қурилиш ва уй-жой коммунал хўжалиги бош бошқармаси ҳамда “Иссиқлик манбаи” ишлаб чиқариш бошқармасининг вилоятдаги марказлашган иссиқлик таъминотидан фойдаланувчи истеъмолчиларни иссиқлик билан таъминлаш иситиш мавсумини 1 апрель соат 09:00 да якунлаш тўғрисидаги таклифи маъқулланган.
Вилоят Иқтисодиёт ва молия бошқармаси бюджет ташкилотларини 2023/2024 йиллардаги иситиш мавсумида истеъмол қилинган иссиқлик энергияси учун тўловларни ўрнатилган тартибда амалга ошириш чораларини кўради.
Шу билан бирга вилоят Қурилиш ва уй-жой коммунал хўжалиги бош бошқармаси ҳамда “Иссиқлик манбаи” ишлаб чиқариш бошқармаси, шаҳар ва туман ҳокимликлари билан биргаликда иситиш мавсуми якунлангани муносабати билан 2024/2025 йиллардаги иситиш мавсумига тайёргарлик кўриш ишлари амалга оширилишини таъминлайди.
Эслатиб ўтамиз, пойтахтда 6 ноябрдан иситиш мавсуми бошланган. 2023 йил якунига кўра, юридик шахслар учун иссиқлик таъминоти хизматлари тарифлари 1,5 бараварга, бюджет муассасалари учун эса 1,6 баробарга ошганди. Ўшанда аҳоли учун тариф ўзгаришсиз қолганди, Veolia Energy компаниясининг иссиқлик таъминоти учун базавий тарифи 67,3 фоизга — 664 465 сўмга ошган.
Изоҳ (0)