O‘zbekistonning yangi tayinlangan elchisi Ashraf Xo‘jayev kecha Qatar amiri shayx Tamim bin Hamad Ol Soniyga ishonch yorliqlarini topshirdi. Bu haqda “Dunyo” AA xabar berdi.
Marosim Dohadagi Lusail saroyida bo‘lib o‘tdi. Faxriy qorovul safini aylanib o‘tgach, elchining Qatar rahbari bilan muloqoti bo‘lib o‘tdi.
Shayx Tamim bin Hamad Ol Soniy O‘zbekiston prezidentiga samimiy salom va ezgu tilaklarini yo‘lladi. Qatar yetakchisi o‘tgan yilning iyun oyida O‘zbekistonga birinchi tashrifini, tarixiy Samarqand shahrini ziyorat qilganini iliq esga oldi.
Amir Qatar va O‘zbekiston o‘rtasidagi munosabatlar jadal rivojlanib borayotganini alohida taʼkidladi. Shuningdek, siyosiy, savdo-iqtisodiy va madaniy-gumanitar sohalarda o‘zaro hamkorlikni yanada faollashtirish uchun ulkan salohiyat mavjudligini qayd etdi.
Suhbat yakunida Shayx Tamim bin Hamad Ol Soniy O‘zbekiston elchisiga mamlakatlar xalqlari farovonligi yo‘lida ikki tomonlama munosabatlarni rivojlantirishda muvaffaqiyat tiladi.
Eslatib o‘tamiz, Ashraf Xo‘jayev 11-fevral kuni O‘zbekistonning Qatardagi birinchi elchisi sifatida Dohaga tashrif buyurgandi.
Izoh (0)