Portugaliyalik mutaxassis Joze Mourinyo maqsadlari borasidagi savollarga javob berdi. U Saudiya Arabistoni klubini boshqarishi mumkinligini inkor etmadi.
“Bu eshikni Krishtianu Ronaldu ochdi. Kelajakda bu haqda mendan so‘rasangiz “Hech qachon hech qachon demang” degan bo‘lardim. U yerdan menga jiddiy taklif bo‘lgan edi, lekin men “Roma”ga sodiq bo‘lganim uchun rad etgandim”, — deya Mourinyo so‘zlarini keltiradi jurnalist Fabritsio Romano X ijtimoiy tarmog‘ida (sobiq Twitter).
Portugaliyalik murabbiyning so‘nggi klubi “Roma” bo‘lib, u 2024-yilning yanvarida jamoani tark etgan edi. 2021—2022-yilgi mavsumda “Roma” Konferensiyalar Ligasida g‘olib chiqdi, bir yildan so‘ng esa Yevropa Ligasi finalgacha bordi. Mourinyo qo‘l ostida “bo‘rilar” jami 96 ta o‘yin o‘tkazgan. Ushbu o‘yinlarda rimliklar 44 marta g‘alaba qozonib, 23 marta durang o‘ynagan va 29 marta mag‘lubiyat alamini totib ko'rgan.
Bundan tashqari Mourinyo yaqin kelajakdagi maqsadlariga to‘xtaldi.
“Agar so‘nggi ikki yilni oladigan bo‘lsak, men ikki marta Yevropa turnirlarining finaliga chiqqanman. Bu faktga qandaydir zavq bilan qarayman, chunki Yevropada hech qanday tarixga ega bo‘lmagan klub bilan ishlaganingizda, bu haqiqatdan ham o‘ziga xos natija ekanini tushunasiz.
Bu mavsumda men finalda o‘ynamayman, lekin umid qilamanki, kelasi to‘rt yil ichida uchta finalga chiqqan yagona murabbiy men bo‘laman”, — deya Mourinyo so‘zlarini keltiradi Football Italia.
Izoh (0)