Моуриньо мақсадлари ҳамда Саудия Арабистони клубини бошқариши мумкинлиги ҳақида тўхталди

Португалиялик мутахассис Жозе Моуриньо мақсадлари борасидаги саволларга жавоб берди. У Саудия Арабистони клубини бошқариши мумкинлигини инкор этмади.

“Бу эшикни Криштиану Роналду очди. Келажакда бу ҳақда мендан сўрасангиз “Ҳеч қачон ҳеч қачон деманг” деган бўлардим. У ердан менга жиддий таклиф бўлган эди, лекин мен “Рома”га содиқ бўлганим учун рад этгандим”, — дея Моуриньо сўзларини келтиради журналист Фабрицио Романо Х ижтимоий тармоғида (собиқ Twitter).

Португалиялик мураббийнинг сўнгги клуби “Рома” бўлиб, у 2024 йилнинг январида жамоани тарк этган эди. 2021—2022 йилги мавсумда “Рома” Конференциялар Лигасида ғолиб чиқди, бир йилдан сўнг эса Европа Лигаси финалгача борди. Моуриньо қўл остида “бўрилар” жами 96 та ўйин ўтказган. Ушбу ўйинларда римликлар 44 марта ғалаба қозониб, 23 марта дуранг ўйнаган ва 29 марта мағлубият аламини тотиб кўрган.

Бундан ташқари Моуриньо яқин келажакдаги мақсадларига тўхталди.

“Агар сўнгги икки йилни оладиган бўлсак, мен икки марта Европа турнирларининг финалига чиққанман. Бу фактга қандайдир завқ билан қарайман, чунки Европада ҳеч қандай тарихга эга бўлмаган клуб билан ишлаганингизда, бу ҳақиқатдан ҳам ўзига хос натижа эканини тушунасиз.

Бу мавсумда мен финалда ўйнамайман, лекин умид қиламанки, келаси тўрт йил ичида учта финалга чиққан ягона мураббий мен бўламан”, — дея Моуриньо сўзларини келтиради Football Italia.