Suriyadagi terrorchilar safiga borib qo‘shilgan jizzaxlik yigit 6 yilga qamaldi. Bu haqda O‘zA xabar berdi.
Fevral oyida Suriyadagi terrorchilar safida jang qilib, jiddiy jarohat olgan jizzaxlik yigit qo‘lga olinib, O‘zbekistonga olib kelingandi.
Tergov ishlari yakunlangach, Jinoyat ishlari bo‘yicha Yangiobod tuman sudida mazkur shaxsning xatti-harakatlari bo‘yicha hukm o‘qildi.
Sud materiallariga ko‘ra, Jizzax viloyatida yashovchi D.Raimov 2023-yilda Toshkent shahar Uchtepa tumanining turli manzillarida umumiy ovqatlanish shoxobchalarida ishlab yurgan vaqtlarida Instagram tarmog‘idan foydalanib, O‘zbekistonda faoliyati taqiqlangan “Tavhid va jihod katibasi” xalqaro terrorchilik tashkiloti tarafdorlarining g‘oyaviy taʼsiriga tushib qoladi. U mazkur tashkilotning Suriyadagi tarafdorlari safiga borib qo‘shilib, ular bilan birga terrorchilik harakatlarida ishtirok etishni maqsad qilgan.
Shu tariqa u “Tavhid va jihod katibasi” xalqaro terrorchilik tashkiloti tarafdorlarining ko‘rsatmalari asosida 2023-yilning 17-iyun kuni Toshkent—Istanbul yo‘nalishi bilan Turkiyaga kelgan.
23-iyun kuni esa Turkiyaning Rayhonli shahridan Suriyaga aylanma yo‘llar orqali o‘tib, Idlib shahrida joylashgan “Tavhid va jihod katibasi” xalqaro terrorchilik tashkiloti aʼzolari joylashgan qarorgohga yetib borgan va tashkilot safiga qabul qilingan.
Mazkur taqiqlangan “Tavhid va jihod katibasi” xalqaro terrorchilik tashkilotida turli g‘oyaviy va harbiy tayyorgarlikdan o‘tayotgan vaqtida esa Suriya armiyasi tomonidan amalga oshirilgan harbiy amaliyot natijasida jarohat olib, u yerda biroz muddat davolangan, so‘ng “Tavhid va jihod katibasi” xalqaro terrorchilik tashkiloti aʼzolariga xo‘jalik ishlarida yordamlashib yurgan.
2023-yil 27-noyabr kuni esa D.Raimovning sog‘lig‘i yomonlashib, “Tavhid va jihod” xalqaro terrorchilik tashkiloti aʼzolari ko‘magi bilan Suriyadan Turkiyaga davolanish maqsadida o‘tgan. Aynan shu vaqtda Turkiya huquqni muhofaza qiluvchi organi xodimlari tomonidan qo‘lga olinib, 2023-yilning 7-dekabr kuni O‘zbekistonga deportatsiya qilingan.
Sudlanuvchi sud majlisida, qaramog‘ida ota-onasi, turmush o‘rtog‘i va bir nafar voyaga yetmagan farzandi borligi, ularning sog‘lig‘i yaxshi emasligi va doimiy qarovga muhtojligini bayon etib, qilmishidan qattiq afsusdaligini, qilmishlaridan chin ko‘ngildan pushaymonligini bildirgan.
Sud mazkur jinoyat ishini ko‘rib chiqib, D.Raimovga nisbatan JKning 1552-moddasi 1-qismi va 2442-moddasi 1-qismi hamda 59-moddasiga asosan 6 yil muddatga ozodlikdan mahrum qilish jazosini tayinladi.
Izoh (0)