Суриядаги террорчилар сафига бориб қўшилган жиззахлик йигит 6 йилга қамалди. Бу ҳақда ЎзА хабар берди.
Февраль ойида Суриядаги террорчилар сафида жанг қилиб, жиддий жароҳат олган жиззахлик йигит қўлга олиниб, Ўзбекистонга олиб келинганди.
Тергов ишлари якунлангач, Жиноят ишлари бўйича Янгиобод туман судида мазкур шахснинг хатти-ҳаракатлари бўйича ҳукм ўқилди.
Суд материалларига кўра, Жиззах вилоятида яшовчи Д.Раимов 2023 йилда Тошкент шаҳар Учтепа туманининг турли манзилларида умумий овқатланиш шохобчаларида ишлаб юрган вақтларида Instagram тармоғидан фойдаланиб, Ўзбекистонда фаолияти тақиқланган “Тавҳид ва жиҳод катибаси” халқаро террорчилик ташкилоти тарафдорларининг ғоявий таъсирига тушиб қолади. У мазкур ташкилотнинг Суриядаги тарафдорлари сафига бориб қўшилиб, улар билан бирга террорчилик ҳаракатларида иштирок этишни мақсад қилган.
Шу тариқа у “Тавҳид ва жиҳод катибаси” халқаро террорчилик ташкилоти тарафдорларининг кўрсатмалари асосида 2023 йилнинг 17 июнь куни Тошкент—Истанбул йўналиши билан Туркияга келган.
23 июнь куни эса Туркиянинг Райҳонли шаҳридан Сурияга айланма йўллар орқали ўтиб, Идлиб шаҳрида жойлашган “Тавҳид ва жиҳод катибаси” халқаро террорчилик ташкилоти аъзолари жойлашган қароргоҳга етиб борган ва ташкилот сафига қабул қилинган.
Мазкур тақиқланган “Тавҳид ва жиҳод катибаси” халқаро террорчилик ташкилотида турли ғоявий ва ҳарбий тайёргарликдан ўтаётган вақтида эса Сурия армияси томонидан амалга оширилган ҳарбий амалиёт натижасида жароҳат олиб, у ерда бир оз муддат даволанган, сўнг “Тавҳид ва жиҳод катибаси” халқаро террорчилик ташкилоти аъзоларига хўжалик ишларида ёрдамлашиб юрган.
2023 йил 27 ноябрь куни эса Д.Раимовнинг соғлиғи ёмонлашиб, “Тавҳид ва жиҳод” халқаро террорчилик ташкилоти аъзолари кўмаги билан Суриядан Туркияга даволаниш мақсадида ўтган. Айнан шу вақтда Туркия ҳуқуқни муҳофаза қилувчи органи ходимлари томонидан қўлга олиниб, 2023 йилнинг 7 декабрь куни Ўзбекистонга депортация қилинган.
Судланувчи суд мажлисида, қарамоғида ота-онаси, турмуш ўртоғи ва бир нафар вояга етмаган фарзанди борлиги, уларнинг соғлиғи яхши эмаслиги ва доимий қаровга муҳтожлигини баён этиб, қилмишидан қаттиқ афсусдалигини, қилмишларидан чин кўнгилдан пушаймонлигини билдирган.
Суд мазкур жиноят ишини кўриб чиқиб, Д.Раимовга нисбатан ЖКнинг 1552-моддаси 1-қисми ва 2442-моддаси 1-қисми ҳамда 59-моддасига асосан 6 йил муддатга озодликдан маҳрум қилиш жазосини тайинлади.
Изоҳ (0)