Rossiya armiyasining 23-mart kuni uyushtirgan hujumlari oqibatida kamida 1 million ukrainalik elektr tarmog‘idan uzilib qolgan. Bu haqda BBC nashri xabar berdi.
Xabarda aytilishicha, mamlakatning ikkinchi yirik shahri Xarkovda elektr uzatish tarmoqlari ishdan chiqqan. Janubdagi Odessa shahrida ham 53 mingdan ortiq xonadon elektr taʼminotidan uzilgan.
Ukraina energetika vaziri German Galushchenko Rossiyani mamlakat energetika tizimida keng miqyosdagi nosozlikni keltirib chiqarishga urinishda ayblagan. Rossiya rasmiylari so‘nggi tajovuzlarni Ukrainaning yaqinda Rossiya hududida uyushtirgan hujumlari uchun qasos ekanini bildirgan.
Ukraina energiya infrastrukturasiga yo‘naltirilgan zarblar oqibatida kamida 5 kishi halok bo‘lgan. 17 nafar fuqaro jarohatlangan. Millionga yaqin aholi tarmoqdan uzilgan.
Ukraina tomoni tungi mudofaa chaqirig‘i davomida Rossiyaning 90 ga yaqin raketa va 60 ta Shahed dronlari chegaradan mamlakat havo hududiga kirib kelganini maʼlum qilgan.
Shuningdek, Rossiya Ukrainaning eng yirik to‘g‘oni — Zaporojyedagi DneproGES inshootiga zarba bergani xabar qilingan. Bu obyektga seriali hujumlar 8 bor sodir etilgan. To‘g‘onda yirik yong‘in yuzaga kelgani xabar qilingan. Ukraina rasmiylari DneproGES faoliyatida uzilish bo‘lmaganini xabar bergan.
Izoh (0)