Rossiya bir yilda Ukrainaga ikki mingdan ortiq Shahed uchirdi

Rossiya bir yil ichida Ukrainaga Shahed-136/131 rusumli ikki mingdan ortiq hujumchi dronlari uchirgan. Bu haqda Ukraina quruqlikdagi kuchlari xabar berdi.

“Rossiya Ukraina hududiga 2000 dan ortiq Shahed tipidagi hujumchi dronlari uchirgan. Birinchi Eron droni Ukraina Qurolli kuchlari tomonidan roppa-rosa bir yil avval — 2022-yil 13-sentabrda urib tushirilgan”, — deyiladi xabarda.

Bu yil o‘rtacha hisobda rus harbiylari Ukraina bo‘ylab kuniga 5,5 ta Shahed uchirgan. Ushbu kamikadze dronlarining umumiy qiymati, turli hisob-kitoblarga ko‘ra, 40 dan 100 million dollargacha va bu 200-500 ming rossiyalikning o‘rtacha pensiyasiga tengdir.

Eslatib o‘tamiz, 13-sentabrga o‘tar kechasi Rossiya qo‘shinlari Odessa va Sumi viloyatlariga bir necha dronlar bilan hujum qildi. Keyinroq Ukraina havo kuchlari 44 ta drondan 32 tasini urib tushirganini ma’lum qildi.