Homiladorlik har bir ayol hayotidagi mo‘jizaviy davr, unda ayol o‘z sog‘lig‘i, ovqatlanish tartibi, dam olishi va hissiyotlari hamda taqiqlangan mahsulot va ishlar haqida ko‘proq o‘ylaydi.
Shunday mahsulotlar borki, bir qarashda ular foydali va hech qanday xavf olib kelmaydigandek tuyuladi, aslida esa ularning iste’moli homila sog‘lig‘iga zarar keltirishi mumkin. Ularga allergiya chaqiradigan, ovqat hazm bo‘lishini qiyinlashtiradigan, homila tushib qolishi va unda nuqsonlar paydo bo‘lishi xavfini yuzaga keltiradigan mahsulotlar kiradi, jumladan:
- Pishirilmagan tuxum
Xom tuxum va uni o‘z ichiga olgan taomlar, xususan, uy sharoitida tayyorlangan mayonez homiladorlarga zararlidir. Ular salmonnelyoz kasalligini keltirib chiqaradi. Bu o‘tkir ichak infeksiyasi bo‘lib, kuchli diareya va qusish bilan kechadi va organizm suvsizlanishiga olib keladi. Bundan tashqari, kuchli infeksiya muddatidan avval tug‘ilish, neonatal asoratlar va hatto homila o‘limiga olib kelishi mumkin.
Kasallikning oldini olish uchun termik ishlov berilgan — qaynatilgan, qovurilgan tuxum yeyish lozim.
- Xom go‘sht
Yaxshi pishmagan go‘sht va qiyma, qizil steyk, dudlangan kolbasa kabilar xavfli turdagi mahsulotlar sirasiga kiradi. Ularda turli parazitlar, masalan, toksoplazma mavjud. Parazitlar yo‘ldosh orqali homilaga kirishi va tug‘ilajak bola rivojlanishida jiddiy o‘zgarishlarga sabab bo‘lishi mumkin.
Buning oldini olish uchun barcha turdagi go‘sht mahsulotlarini to‘liq pishirish lozim.
- Xom baliq
Termik ishlov berilmay iste’mol qilinadigan baliq turlari — daryo va okeanning yovvoyi baliqlari, mollyuskalar va sushi mahsulotlarini iste’mol qilishda bo‘lajak onalar ehtiyot bo‘lishi lozim.
Ushbu mahsulotlarda xom go‘sht singari parazitlar, listeriya, botulinobakteriya kabilar ko‘p uchraydi. Ular va konservalangan mahsulotlar ona va bola hayotiga xavf soladigan botulizm kasalligini keltirib chiqaradi.
Tug‘ilajak farzandingiz sog‘lig‘i haqida qayg‘ursangiz, yuqorida ta’kidlab o‘tilganidek, faqat termik ishlov berilgan taomlarni iste’mol qiling. Dengiz mahsulotlari va baliqlarni doimo yaxshilab pishiring.
- Jigar
Jigar aslida qonni ko‘paytirish xususiyatga ega bo‘lib, temir tanqisligi bilan bog‘liq anemiyada iste’mol qilinishi foydalidir, ammo homiladorlikda jigardagi haddan ortiq A vitamin bolada tug‘ma nuqsonlar vujudga kelishiga sabab bo‘lishi mumkin. Mol va qo‘y jigarini yeyishda me’yorga amal qiling.
- Yumshoq pishloqlar
Bri, kamamber, gorgonzola, rokfor kabi turdagi yumshoq va mog‘orli pishloqlar organizmga listerioz bakteriyasi yuqishiga va natijada muddatidan avval tug‘ilish, sepsis, meningit kabi noxush holatlarga olib kelishi mumkin.
Pishloqni sevuvchilar mahsulotning qattiq turini, masalan chedder, gauda, parmezan kabi pishloqlarni iste’mol qilishi mumkin.
- Pasterizatsiya qilinmagan sut
Pasterizatsiya qilinmagan deganda yuqori harorat bilan ishlov berilmagan mahsulotlar tushuniladi. Ularga nafaqat sut, balki qatiq, qaymoq va yogurt ham kiradi.
- Tarkibida kofein mavjud mahsulotlar
Kofeinli mahsulotlarga qahva, kola, achchiq ko‘k choy, shokolad, energetik ichimliklar va ayrim O‘RVIga qarshi dorilar kiradi. Qonda kofein miqdorining oshishi homila rivojlanishida nuqsonlar va rivojlanishdan ortda qolishga sabab bo‘ladi. Kuniga o‘rtacha 200 mg qahva ichish mumkin.
- Yaxshi yuvilmagan meva va sabzavotlar
Chala yuvilgan mevalar, qulupnay va malina kabi rezavorlar tarkibida xavfi bakteriyalar mavjud bo‘lib, ular toksoplazma, botulizm va listerioz kabi kasalliklarni keltirib chiqaradi. Shuning uchun har qanday meva va sabzavotni yaxshilab yuvish tavsiya etiladi.
Izoh (0)