Birinchi trimestrda homilador ayolning to‘g‘ri ovqatlanishi juda ham muhimdir, chunki bu davrda homila faol tarzda shakllanadi. Ayniqsa, bo‘lajak onada jig‘ildon qaynashi yoki toksikoz kuzatilsa, parhezga rioya qilishi kerak, deb yozadi Wday.
Homilador ayolning ratsioni qanday bo‘lishi kerak?
Homilador ayol hamma o‘ylaganidek ikki karra ko‘p ovqatlanmasligi kerak. Homilaga kaloriya emas, balki ozuqa moddalari kerak. Oziq-ovqat sog‘lom va vitaminlarga boy bo‘lishi shart. Birinchi trimestrda parhezga rioya qilish muhimdir. Oziq-ovqatning energiya qiymati 2700 Kkaldan oshmasligi lozim.
Ovqatlanish bo‘yicha tavsiyalar:
- tez-tez, oz-ozdan kuniga 5-6 martagacha ovqatlanish;
- oxirgi ovqatni yotishdan 2-3 soat oldin iste’mol qilish;
- qaynatilgan, bug‘da pishirilgan ovqatlarni iste’mol qilish, qovurilganlari hazm qilish tizimini zo‘riqtiradi;
- kuniga 5-6 grammdan ko‘p bo‘lmagan tuz iste’mol qilish;
- ovqatni iliq holatda iste’mol qilish;
- kuniga 1,5 litrdan ko‘p bo‘lmagan suyuqlik ichish.
Qanday mahsulotlar iste’mol qilish mumkin?
Birinchi trimestrda ko‘p kletchatka kerak bo‘ladi, u ichak faoliyatini rag‘batlantiradi. Kalsiy, yod, temir, rux, fosfor, selen, B, D, E vitaminlari, foliy kislotasi ham muhim ahamiyatga ega. Bundan tashqari, boshqa oziq moddalar kerak, shuning uchun ratsion xilma-xil bo‘lishi kerak.
Foydali mahsulotlar:
- meva va sabzavotlar;
- dengiz baliqlari;
- sutli mahsulotlar;
- yog‘siz go‘sht — quyon, bedana, mol go‘shti;
- grechka, jo‘xori uni, tariq, arpa va bug‘doy;
- dengiz karami;
- o‘simlik moyi;
- yong‘oq;
- tuxum, lekin haftasiga 2 donadan ko‘p emas.
Nimalar iste’mol qilish mumkin emas?
Oddiy uglevodlarni o‘z ichiga olgan mahsulotlarni iste’mol qilmaslik lozim. Ular bola uchun foydali emas, balki faqat vazn ortishiga hissa qo‘shadi. Shirinlik, shokolad va shakar iste’mol qilishni cheklash lozim. Xamir va un mahsulotlarini ko‘p tanovul qilmaslik lozim. Bo‘yoqlar, ta’m stabilizatorlari va konservantlarni o‘z ichiga olgan zararli mahsulotlar umuman taqiqlanadi.
Fastfud, dudlangan go‘sht, kolbasa, sosiska, mayonez, ketchup, souslardan voz kechish kerak. Bu ro‘yxatga chips va krakerlar, go‘sht va baliq konservalari ham kiradi. Gazlangan ichimliklar va achchiq qahvalardan voz kechish tavsiya etiladi.
Homiladorlik davrida to‘g‘ri va to‘yimli ovqatlanish chaqaloq normal rivojlanishining kalitidir. Noto‘g‘ri ovqatlanish toksikozga va hatto bola tushishiga olib kelishi mumkin.
Izoh (0)