Ҳомиладорлик ҳар бир аёл ҳаётидаги мўжизавий давр, унда аёл ўз соғлиғи, овқатланиш тартиби, дам олиши ва ҳиссиётлари ҳамда тақиқланган маҳсулот ва ишлар ҳақида кўпроқ ўйлайди.
Шундай маҳсулотлар борки, бир қарашда улар фойдали ва ҳеч қандай хавф олиб келмайдигандек туюлади, аслида эса уларнинг истеъмоли ҳомила соғлиғига зарар келтириши мумкин. Уларга аллергия чақирадиган, овқат ҳазм бўлишини қийинлаштирадиган, ҳомила тушиб қолиши ва унда нуқсонлар пайдо бўлиши хавфини юзага келтирадиган маҳсулотлар киради, жумладан:
- Пиширилмаган тухум
Хом тухум ва уни ўз ичига олган таомлар, хусусан, уй шароитида тайёрланган майонез ҳомиладорларга зарарлидир. Улар салмоннелёз касаллигини келтириб чиқаради. Бу ўткир ичак инфекцияси бўлиб, кучли диарея ва қусиш билан кечади ва организм сувсизланишига олиб келади. Бундан ташқари, кучли инфекция муддатидан аввал туғилиш, неонатал асоратлар ва ҳатто ҳомила ўлимига олиб келиши мумкин.
Касалликнинг олдини олиш учун термик ишлов берилган — қайнатилган, қовурилган тухум ейиш лозим.
- Хом гўшт
Яхши пишмаган гўшт ва қийма, қизил стейк, дудланган колбаса кабилар хавфли турдаги маҳсулотлар сирасига киради. Уларда турли паразитлар, масалан, токсоплазма мавжуд. Паразитлар йўлдош орқали ҳомилага кириши ва туғилажак бола ривожланишида жиддий ўзгаришларга сабаб бўлиши мумкин.
Бунинг олдини олиш учун барча турдаги гўшт маҳсулотларини тўлиқ пишириш лозим.
- Хом балиқ
Термик ишлов берилмай истеъмол қилинадиган балиқ турлари — дарё ва океаннинг ёввойи балиқлари, моллюскалар ва суши маҳсулотларини истеъмол қилишда бўлажак оналар эҳтиёт бўлиши лозим.
Ушбу маҳсулотларда хом гўшт сингари паразитлар, листерия, ботулинобактерия кабилар кўп учрайди. Улар ва консерваланган маҳсулотлар она ва бола ҳаётига хавф соладиган ботулизм касаллигини келтириб чиқаради.
Туғилажак фарзандингиз соғлиғи ҳақида қайғурсангиз, юқорида таъкидлаб ўтилганидек, фақат термик ишлов берилган таомларни истеъмол қилинг. Денгиз маҳсулотлари ва балиқларни доимо яхшилаб пиширинг.
- Жигар
Жигар аслида қонни кўпайтириш хусусиятга эга бўлиб, темир танқислиги билан боғлиқ анемияда истеъмол қилиниши фойдалидир, аммо ҳомиладорликда жигардаги ҳаддан ортиқ А витамин болада туғма нуқсонлар вужудга келишига сабаб бўлиши мумкин. Мол ва қўй жигарини ейишда меъёрга амал қилинг.
- Юмшоқ пишлоқлар
Бри, камамбер, горгонзола, рокфор каби турдаги юмшоқ ва моғорли пишлоқлар организмга листериоз бактерияси юқишига ва натижада муддатидан аввал туғилиш, сепсис, менингит каби нохуш ҳолатларга олиб келиши мумкин.
Пишлоқни севувчилар маҳсулотнинг қаттиқ турини, масалан чеддер, гауда, пармезан каби пишлоқларни истеъмол қилиши мумкин.
- Пастеризация қилинмаган сут
Пастеризация қилинмаган деганда юқори ҳарорат билан ишлов берилмаган маҳсулотлар тушунилади. Уларга нафақат сут, балки қатиқ, қаймоқ ва йогурт ҳам киради.
- Таркибида кофеин мавжуд маҳсулотлар
Кофеинли маҳсулотларга қаҳва, кола, аччиқ кўк чой, шоколад, энергетик ичимликлар ва айрим ЎРВИга қарши дорилар киради. Қонда кофеин миқдорининг ошиши ҳомила ривожланишида нуқсонлар ва ривожланишдан ортда қолишга сабаб бўлади. Кунига ўртача 200 мг қаҳва ичиш мумкин.
- Яхши ювилмаган мева ва сабзавотлар
Чала ювилган мевалар, қулупнай ва малина каби резаворлар таркибида хавфи бактериялар мавжуд бўлиб, улар токсоплазма, ботулизм ва листериоз каби касалликларни келтириб чиқаради. Шунинг учун ҳар қандай мева ва сабзавотни яхшилаб ювиш тавсия этилади.
Изоҳ (0)