Iroq Turkiyani Iroqning shimoliy hududlarida Kurdiston ishchilar partiyasi (KIP) tarafdorlariga qarshi yirik harbiy operatsiya o‘tkazishda qo‘llab-quvvatlashga tayyor. Bu haqda Anadolu Ajansi xabar berdi.
Xabarga ko‘ra, Turkiya delegatsiyasining Bag‘dodga tashrifi chog‘ida mazkur masala yuzasidan muzokaralar bo‘lib o‘tgan. Iroq hukumati kurd muxtoriyatining shimoliy hududlarida Turkiya 30-40 km bo‘lgan bufer zonasini yaratishni maʼqullagan.
Maʼlum bo‘lishicha, oxirgi uch oyda Turkiya, Iroq va kurd muxtoriyati rasmiylari Anqara 2022-yildan buyon “Panja-Qal’a” operatsiyasini o‘tkazayotgan mintaqalarda bo‘lishi kutilayotgan jangovar harakatlar yuzasidan maslahatlar o‘tkazgan. Tomonlar allaqachon harbiy kampaniya tafsilotlari bo‘yicha kelishib olgan. Shimoliy Iroq Kurdistonidagi operatsiya Iroq razvedka xizmatlari va kurd muxtoriyati yordamiga tayanadi. Bag‘dod va Arbil ham Sulaymoniya hamda Naynava viloyatlaridagi KIP tarafdorlariga qarshi chora ko‘rishga tayyor ekanliklarini ma’lum qilgan.
Turkiya TIVning 14-mart kuni xabar berishicha, Anqara va Bag‘dod terrorizmga qarshi kurash masalalari bo‘yicha qo‘mita tuzishga qaror qilgan. KIP ikki davlat xavfsizligiga ham tahdid solayotgani bunga sabab bo‘lgan. Turkiya Iroqning KIPni taqiqlangan tashkilot qatoriga kiritish qarorini olqishlagan.
Izoh (0)