O‘zbekiston Pro ligasi 1-turidan o‘rin olgan “Aral” - “Do‘stlik” uchrashuvida yuzaga kelgan 2 ta bahsli vaziyat ekspert-hakamlar komissiyasi tomonidan ko‘rib chiqildi.
O‘zbekiston Pro ligasi 1-turidan o‘rin olgan “Aral” – “Do‘stlik” bahsining 18-daqiqasida mezbonlar yon chiziqdan to‘pni jarima maydonchasi ichiga oshirib bergan, himoyalanayotgan jamoa vakili “Aral”ning 17-raqamli futbolchisini chalib, yiqitgan. Shundan so‘ng, “Aral”ning 32-raqamli futbolchisi jarima maydonchasi ichiga oshirib berilgan to‘pni qo‘l bilan to‘xtatib, gol urgan. Uchrashuv bosh hakami futbolchi yiqitilgan vaziyatni ham, to‘p qo‘l bilan o‘ynalgan vaziyatni ham e’tibordan chetda qoldirib, golni inobatga olgan.
Ekspert-hakamlar komissiyasi qaroriga ko‘ra bu vaziyatda 1-holat uchun penalti belgilanishi kerak edi, futbolchi qo‘pollik bilan yiqitilgan. Shuningdek, keyingi holatda to‘p qo‘l bilan o‘ynalgan, ya’ni bosh hakam ikkala taraf zarariga xato qilgan. Bu vaziyatda bosh hakam golni bekor qilib, dastlabki holatdagi yiqitilishga asoslangan holda penalti belgilashi kerak edi. Komissiya hakamning qarori noto‘g‘ri deb topgan.
Ikkinchi vaziyat uchrashuvning so‘nggi daqiqalarida yuz bergan.
Uchrashuvning 90+2-daqiqasida “Do‘stlik” futbolchilari tezkor qarshi hujum uyushtirgach, jamoaning 14-raqamli futbolchisi R. Ro‘ziyev raqib jarima maydonchasi ichiga kirgan va darvozabon bilan to‘qnashib, yiqilgan. Bosh hakam Jaloliddin Husnitdinov penalti belgilamay, o‘yinni davom ettirishga ruxsat bergan. Shundan so‘ng, yordamchi hakamning tavsiyasiga ko‘ra, to‘p o‘yinga kiritilayotganda qoidabuzarlik bo‘lganini qayd etib, to‘pni “Do‘stlik” darvozaboniga qaytargan.
Ekspert-hakamlar komissiyasi qaroriga ko‘ra, “Do‘stlik” klubi darvozaboni to‘pni o‘yinga kiritishni noto‘g‘ri tarzda amalga oshirgan (qoidalarga ko‘ra, darvozabon harakatlanayotgan to‘pni o‘yinga kirita olmaydi, buning uchun to‘p to‘xtagan bo‘lishi lozim), shu sababli bundan keyin sodir bo‘lgan har qanday hodisa inobatga olinmay, to‘p darvozabonga qaytarib berilishi kerak edi. Vaziyat boshida yordamchi hakam darhol bayrog‘ini ko‘tarib, bosh hakamga ishora qilganini inobatga olgan holda yakuniy qaror to‘g‘ri bo‘lganini qayd etishimiz lozim. Hakamlar jamoasining qarori ekspertlar tomonidan to‘g‘ri deb topilgan.
“Aral” – “Do‘stlik” bahsi bosh hakami Jaloliddin Husnitdinov o‘yinda yo‘l qo‘ygan xatolari tufayli uchrashuv nazoratchisi tomonidan 7,4 (qoniqarsiz) bahosiga loyiq ko‘rilgan. Shunga ko‘ra, O‘FA Hakamlar qo‘mitasi tomonidan Ekspert-hakamlar komissiyasining chiqargan xulosasi, uchrashuv nazoratchisining qo‘ygan bahosi inobatga olingan holda bosh hakam Jaloliddin Husnitdinovga Hakamlar tartib-intizom kodeksining 2.3.3-bandiga muvofiq, barcha musobaqalardan 2024-yil 15-mayga qadar, ya’ni:
— O‘zbekiston Kubogidan 3 ta tur;
— Superliga bahslaridan 4 ta tur;
— Pro liga bahslaridan 6 ta tur;
— Ayollar Oliy ligasidan 8 ta tur;
— U21 ligasidan 4 ta tur uchrashuvlaridan chetlatish, o‘yin uchun belgilangan hakamlik maoshidan 75% miqdorida olib tashlash jarima-intizom chorasi qo‘llanildi.
Izoh (0)