Ўзбекистон Про лигаси 1-туридан ўрин олган “Арал” - “Дўстлик” учрашувида юзага келган 2 та баҳсли вазият эксперт-ҳакамлар комиссияси томонидан кўриб чиқилди.
Ўзбекистон Про лигаси 1-туридан ўрин олган “Арал” – “Дўстлик” баҳсининг 18-дақиқасида мезбонлар ён чизиқдан тўпни жарима майдончаси ичига ошириб берган, ҳимояланаётган жамоа вакили “Арал”нинг 17-рақамли футболчисини чалиб, йиқитган. Шундан сўнг, “Арал”нинг 32-рақамли футболчиси жарима майдончаси ичига ошириб берилган тўпни қўл билан тўхтатиб, гол урган. Учрашув бош ҳаками футболчи йиқитилган вазиятни ҳам, тўп қўл билан ўйналган вазиятни ҳам эътибордан четда қолдириб, голни инобатга олган.
Эксперт-ҳакамлар комиссияси қарорига кўра бу вазиятда 1-ҳолат учун пенальти белгиланиши керак эди, футболчи қўполлик билан йиқитилган. Шунингдек, кейинги ҳолатда тўп қўл билан ўйналган, яъни бош ҳакам иккала тараф зарарига хато қилган. Бу вазиятда бош ҳакам голни бекор қилиб, дастлабки ҳолатдаги йиқитилишга асосланган ҳолда пенальти белгилаши керак эди. Комиссия ҳакамнинг қарори нотўғри деб топган.
Иккинчи вазият учрашувнинг сўнгги дақиқаларида юз берган.
Учрашувнинг 90+2-дақиқасида “Дўстлик” футболчилари тезкор қарши ҳужум уюштиргач, жамоанинг 14-рақамли футболчиси Р. Рўзиев рақиб жарима майдончаси ичига кирган ва дарвозабон билан тўқнашиб, йиқилган. Бош ҳакам Жалолиддин Ҳуснитдинов пенальти белгиламай, ўйинни давом эттиришга рухсат берган. Шундан сўнг, ёрдамчи ҳакамнинг тавсиясига кўра, тўп ўйинга киритилаётганда қоидабузарлик бўлганини қайд этиб, тўпни “Дўстлик” дарвозабонига қайтарган.
Эксперт-ҳакамлар комиссияси қарорига кўра, “Дўстлик” клуби дарвозабони тўпни ўйинга киритишни нотўғри тарзда амалга оширган (қоидаларга кўра, дарвозабон ҳаракатланаётган тўпни ўйинга кирита олмайди, бунинг учун тўп тўхтаган бўлиши лозим), шу сабабли бундан кейин содир бўлган ҳар қандай ҳодиса инобатга олинмай, тўп дарвозабонга қайтариб берилиши керак эди. Вазият бошида ёрдамчи ҳакам дарҳол байроғини кўтариб, бош ҳакамга ишора қилганини инобатга олган ҳолда якуний қарор тўғри бўлганини қайд этишимиз лозим. Ҳакамлар жамоасининг қарори экспертлар томонидан тўғри деб топилган.
“Арал” – “Дўстлик” баҳси бош ҳаками Жалолиддин Ҳуснитдинов ўйинда йўл қўйган хатолари туфайли учрашув назоратчиси томонидан 7,4 (қониқарсиз) баҳосига лойиқ кўрилган. Шунга кўра, ЎФА Ҳакамлар қўмитаси томонидан Эксперт-ҳакамлар комиссиясининг чиқарган хулосаси, учрашув назоратчисининг қўйган баҳоси инобатга олинган ҳолда бош ҳакам Жалолиддин Ҳуснитдиновга Ҳакамлар тартиб-интизом кодексининг 2.3.3-бандига мувофиқ, барча мусобақалардан 2024 йил 15 майга қадар, яъни:
— Ўзбекистон Кубогидан 3 та тур;
— Суперлига баҳсларидан 4 та тур;
— Про лига баҳсларидан 6 та тур;
— Аёллар Олий лигасидан 8 та тур;
— U21 лигасидан 4 та тур учрашувларидан четлатиш, ўйин учун белгиланган ҳакамлик маошидан 75% миқдорида олиб ташлаш жарима-интизом чораси қўлланилди.
Изоҳ (0)