Yevropa tez o‘sib borayotgan iqlim o‘zgarishi xavflariga tayyormi?

Yevropa boshqa qit’alarga qaraganda ikki barobar tez isimoqda. Shoshilinch choralar ko‘rilmasa, oqibatlari halokatli bo‘lishi mumkin. Bu haqda Yevropa atrof-muhit agentligi (YAA) hisobotida ma’lum qildi.

So‘nggi yillarda sodir bo‘lgan haddan tashqari issiqlik, qurg‘oqchilik, o‘rmon yong‘inlari va suv toshqini Yevropa aholisining turmush sharoitlariga ta’sir ko‘rsatmoqda. Iqlim o‘zgarishi bilan bog‘liq xavflarning birinchi umumyevropa tahlili mualliflariga ko‘ra, agar shoshilinch choralar ko‘rilmasa, oqibatlari “halokatli” bo‘lishi mumkin. Hammasi bo‘lib, mualliflar 36 ta tahdidni sanab o‘tgan, ulardan 21 tasi zudlik bilan chora ko‘rishni talab qiladi va sakkiztasi “kechiktirib bo‘lmaydigan” deb belgilangan.

Hisobot mualliflari taʼkidlaganidek, Yevropada harorat 1980-yillardan beri o‘rtacha global ko‘rsatkichdan ikki barobar tez ko‘tarilgan. Yevropa davlatlarining bunga qarshi ko‘rayotgan choralari esa yetarli emas.

Yevropa va milliy siyosiy yetakchilar emissiyalarni keskin qisqartirish va iqlimga moslashish strategiyalari va choralarini ishlab chiqish orqali iqlim xavflarini kamaytirish uchun hozir harakat qilishlari lozim, — ta’kidladi YAA ijrochi direktori Leena Yulya-Mononen.

2022-yil yozida Yevropada jazirama tufayli 60-70 minggacha erta o‘lim holatlari qayd etilgan. Tezkor choralar ko‘rilmasa, hisobotda aniqlangan 36 ta iqlim xavfining aksariyati joriy asrda “tanqidiy yoki halokatli darajaga” yetishi mumkin.

Agentlikning ogohlantirishicha, eng yomon ssenariyda yuz minglab odamlar jazirama to‘lqinlaridan nobud bo‘lishi va faqat qirg‘oq bo‘ylab suv toshqini tufayli iqtisodiy yo‘qotishlar yiliga 1 trillion yevrodan oshishi mumkin.

Yevrokomissiya YAA hisobotiga javobini 12 mart kuni e’lon qilishi kutilmoqda.