Европа бошқа қитъаларга қараганда икки баробар тез исимоқда. Шошилинч чоралар кўрилмаса, оқибатлари ҳалокатли бўлиши мумкин. Бу ҳақда Европа атроф-муҳит агентлиги (EAА) ҳисоботида маълум қилди.
Сўнгги йилларда содир бўлган ҳаддан ташқари иссиқлик, қурғоқчилик, ўрмон ёнғинлари ва сув тошқини Европа аҳолисининг турмуш шароитларига таъсир кўрсатмоқда. Иқлим ўзгариши билан боғлиқ хавфларнинг биринчи умумевропа таҳлили муаллифларига кўра, агар шошилинч чоралар кўрилмаса, оқибатлари “ҳалокатли” бўлиши мумкин. Ҳаммаси бўлиб, муаллифлар 36 та таҳдидни санаб ўтган, улардан 21 таси зудлик билан чора кўришни талаб қилади ва саккизтаси “кечиктириб бўлмайдиган” деб белгиланган.
Ҳисобот муаллифлари таъкидлаганидек, Европада ҳарорат 1980 йиллардан бери ўртача глобал кўрсаткичдан икки баробар тез кўтарилган. Европа давлатларининг бунга қарши кўраётган чоралари эса етарли эмас.
Европа ва миллий сиёсий етакчилар эмиссияларни кескин қисқартириш ва иқлимга мослашиш стратегиялари ва чораларини ишлаб чиқиш орқали иқлим хавфларини камайтириш учун ҳозир ҳаракат қилишлари лозим, — таъкидлади EAА ижрочи директори Леена Юля-Мононен.
2022 йил ёзида Европада жазирама туфайли 60-70 минггача эрта ўлим ҳолатлари қайд этилган. Тезкор чоралар кўрилмаса, ҳисоботда аниқланган 36 та иқлим хавфининг аксарияти жорий асрда “танқидий ёки ҳалокатли даражага” етиши мумкин.
Агентликнинг огоҳлантиришича, энг ёмон сценарийда юз минглаб одамлар жазирама тўлқинларидан нобуд бўлиши ва фақат қирғоқ бўйлаб сув тошқини туфайли иқтисодий йўқотишлар йилига 1 триллион евродан ошиши мумкин.
Еврокомиссия EAА ҳисоботига жавобини 12 март куни эълон қилиши кутилмоқда.
Изоҳ (0)