Ozarbayjon Armaniston hukumatidan to‘rt qishloq – Baganis Ayrim, Ashagi Askipara, Xeyrimli va Gizilgadjili ustidan nazoratni zudlik bilan qaytarishni talab qilmoqda. Bu haqda Ozarbayjon bosh vaziri o‘rinbosari Shahin Mustafoyev ma’lum qildi, deya xabar beradi Azertac.
“Armaniston tomonidan bosib olingan to‘rtta eksklav bo‘lmagan Ozarbayjon qishloqlariga kelsak, ularning Ozarbayjonga tegishliligi shubhasizdir va ular zudlik bilan ozod qilinishi kerak”, — dedi u.
Bu qishloqlar Ozarbayjonning xalqaro miqyosda tan olingan hududida joylashgan. Armanlar ularni 90-yillarning boshlarida janglar paytida egallab olgan.
Taʼkidlanishicha, Ozarbayjonning armanlar nazoratidagi to‘rtta eksklav qishlog‘i (Yuxari Askipara, Sofulu, Barxudarli va Kyarki) masalasi Armaniston-Ozarbayjon chegarasini delimitatsiya qilish jarayoni doirasida hal etiladi.
Shuningdek, Mustafoyev Ozarbayjon va Armanistonda tuzilgan davlat chegaralarini delimitatsiya qilish komissiyalari 7 ta yig‘ilishi o‘tkazganiga ham to‘xtalib o‘tdi. Hozirgi bosqichda komissiyalar faoliyati doirasida delimitatsiya ishlarini olib borish uchun zarur bo‘lgan normativ-huquqiy bazani yaratish bo‘yicha ishlar ketmoqda.
Bundan tashqari, Boku Armaniston ommaviy axborot vositalarining Ozarbayjon tomonidan 31 ta arman qishlog‘i bosib olingani haqidagi maʼlumotlarini rad etdi.
Izoh (0)