Armaniston hukumati kelajakda Yevropa Ittifoqiga (YI) a’zo bo‘lish uchun u bilan munosabatlarni chuqurlashtirmoqchi. Bu haqda respublika parlamenti spikeri Alen Simonyanga tayanib, The Moscow Times xabar berdi.
Armaniston Yevropa integratsiyasi yo‘nalishiga tayyormi, degan savolga Simonyan: “Biz, albatta, tayyormiz”, deb javob berdi. Uning so‘zlariga ko‘ra, mamlakat “maksimal xavfsizlik”ni taʼminlaydigan yo‘nalishda harakat qiladi.
Bugun demokratiya eng katta xavfsizlik tizimidir. Bizning xavfsizligimiz demokratik davlat bo‘lib, demokratik tizim bilan yaqin hamkorlik qilishda deb hisoblaymiz, — deydi parlamenti spikeri.
O‘z navbatida, Yevroparlament aʼzosi Andryus Kubilyus YIni Armaniston bilan yaqinlashishga qaratilgan bosqichma-bosqich strategiya ishlab chiqishga, jumladan, respublikaga YI aʼzoligiga nomzod maqomini berishga chaqirdi.
Birlashish vazifasi Armaniston va uning xalqini Yevropa tomon intilishlariga munosib javob berishdir, — dedi u.
Kubilyusga ko‘ra, Armaniston bosh vaziri Nikol Pashinyan o‘zining geosiyosiy yo‘nalishini Yevropa Ittifoqiga qaratgani sababli, ittifoq Armanistonni “Yevropa oilasining bir qismi” deb hisoblashi kerak.
Shu bilan birga, parlamentariy bu intilishlar Kremlni g‘azablantirishi, buning ortidan respublika xavfsizligi va iqtisodiyotiga ta’sir o‘tkazishi mumkinligidan ogohlantirdi.
Shuning uchun Armaniston Yevropa Ittifoqi va G‘arb demokratiyasidan kuchli xavfsizlik kafolatlariga muhtoj. Shuningdek, YI Rossiya yarata oladigan iqtisodiy muammolarni yumshatishga tayyor bo‘lishi kerak, — deya xulosa qildi Kubilyus.
Izoh (0)