“Tolibon” kon va neft vazirligi Amudaryo havzasidan qazib olingan xom neft miqdori kuniga 1350 tonnaga yetganini ma’lum qildi. Bu haqda Etilaatroz xabar berdi.
Vazirlik matbuot kotibi Humoyun Afg‘on bu miqdorda xom neft 24 quduqdan qazib olinayotganini aytdi. Hozirda Qoshg‘ariy konida 15 ta, Angut konida 6 ta va Oqdaryo konida 3 ta quduq ishlamoqda. Bu quduqlardan olinadigan neft mamlakat ichida xususiy sektor tomonidan qayta ishlanadi.
“2024-yil oxirigacha Amudaryo havzasidagi neft quduqlari soni 47 taga ko‘payadi, neft qazib olish hajmi esa uch ming tonnaga yetadi”, — deydi vazirlik
Amudaryo neft koni Afg‘oniston shimolidagi Sarpol, Juzjon va Faryob viloyatlarida joylashgan. Bir yil oldin “Tolibon” neft qazib olish shartnomasini Xitoyning CPECC kompaniyasiga topshirgan edi. Ushbu shartnoma muddati 25 yil bo‘lib, bu muddatda Qoshg‘ariy, Zumradsoy, Bozor Komi, Oqdaryo va Angut konlaridan 4500 kvadrat metr maydonda neft qazib olinishi kerak.
Izoh (0)