Madaniyat vaziri Ozodbek Nazarbekov Qatarda O‘zbekiston madaniyati, hunarmandchiligi va turizm kunlarida qatnashmoqda.
Prezidentning Qatarga davlat tashrifi davomida siyosiy, savdo-iqtisodiy, transport, xavfsizlik va madaniy-gumanitar sohalarda erishilgan kelishuvlarni amalga oshirish bo‘yicha amaliy harakatlar rejasi (“yo‘l xaritasi”)ning 19-bandiga asosan, 2024-yilning 20–26-fevral kunlari Qatar poytaxti Doha shahrida O‘zbekiston madaniyati, hunarmandchiligi va turizmi haftaligi tashkil etildi.
Tadbirdan ko‘zlangan asosiy maqsad: o‘zbek madaniyatining boy merosini tarannum etish, uning mumtoz va xalq amaliy san’ati, ijrochilik an’analari, urf-odat va marosimlarini namoyish qilish hamda Qatar bilan yo‘lga qo‘yilgan o‘zaro do‘stlik aloqalarini yanada mustahkamlashdan iborat. 22-fevral kuni “Darb al-Saay” madaniyat maydonida tadbirning tantanali ochilish marosimi bo‘lib o‘tdi. Yana 3 kun davomida bayram tadbirlari davom etishi belgilangan.
Ma’lumot uchun, “Darb al-Saay” madaniyat maydonida shu paytgacha faqatgina Qatar milliy kuni nishonlangan bo‘lib, birinchi marotaba xorijiy tadbir o‘tkazish uchun ushbu maydon ajratilmoqda.
Tadbirning ochilish marosimida madaniyat vaziri Ozodbek Nazarbekov, Qatar madaniyat vaziri Abdulrahmon bin Hamad al Tani, Qatar hukumati vakillari, mahalliy aholi hamda bu yerdagi o‘zbek diasporasi vakillari ishtirok etishdi.
Ochilish marosimida O‘zbekistonning rang-barang madaniy landshafti, jumladan, maqom va baxshilik san’ati kabi nomoddiy madaniy meros namoyishi; O‘zbekistonning zargarlik, xattotlik, milliy musiqa asboblari, miniatyura va badiiy, dekorativ hamda amaliy san’ati yo‘nalishlarida, shuningdek, gastronomik ko‘rgazmalar tashkil etildi.
Mehmonlar avloddan avlodga o‘tib davom etib kelayotgan hunarmandchilik namunalari bilan tanishdi, milliy taomlardan tatib ko‘rib, hunarmandlar va oshpazlar bilan suhbatda bo‘ldi.
Ochilish marosimidan so‘ng O‘zbekiston va Qatar madaniyat vazirlari qatnashib, ular o‘rtasida tet-a-tet muloqot bo‘lib o‘tdi. Tadbir doirasidagi maydon tomoshalari, hunarmandchilik va gastronomik ko‘rgazma tomoshasidan so‘ng, maydonda tashkil etilgan sahnada o‘zbek san’at ustalari ishtirokida konsert dasturi namoyish etildi.
O‘zbekiston madaniyati, hunarmandchiligi va turizm kunlari bilan bir vaqtda Doha shahrida Ozarbayjon milliy kuni bo‘lib o‘tmoqda, Qatar tomoni taklifiga ko‘ra O‘zbekiston madaniyati, hunarmandchiligi va turizm kunlarining rasmiy ochilish marosimida Ozarbayjon prezidentining yordamchisi Anar Alakbarov, madaniyat vaziri Adil Karimli va Ozarbayjon hukumati vakillari ham ishtirok etdi.
Izoh (0)