Маданият вазири Озодбек Назарбеков Қатарда Ўзбекистон маданияти, ҳунармандчилиги ва туризм кунларида қатнашмоқда.
Президентнинг Қатарга давлат ташрифи давомида сиёсий, савдо-иқтисодий, транспорт, хавфсизлик ва маданий-гуманитар соҳаларда эришилган келишувларни амалга ошириш бўйича амалий ҳаракатлар режаси (“йўл харитаси”)нинг 19-бандига асосан, 2024 йилнинг 20–26 февраль кунлари Қатар пойтахти Доҳа шаҳрида Ўзбекистон маданияти, ҳунармандчилиги ва туризми ҳафталиги ташкил этилди.
Тадбирдан кўзланган асосий мақсад: ўзбек маданиятининг бой меросини тараннум этиш, унинг мумтоз ва халқ амалий санъати, ижрочилик анъаналари, урф-одат ва маросимларини намойиш қилиш ҳамда Қатар билан йўлга қўйилган ўзаро дўстлик алоқаларини янада мустаҳкамлашдан иборат. 22 февраль куни “Дарб ал-Саай” маданият майдонида тадбирнинг тантанали очилиш маросими бўлиб ўтди. Яна 3 кун давомида байрам тадбирлари давом этиши белгиланган.
Маълумот учун, “Дарб ал-Саай” маданият майдонида шу пайтгача фақатгина Қатар миллий куни нишонланган бўлиб, биринчи маротаба хорижий тадбир ўтказиш учун ушбу майдон ажратилмоқда.
Тадбирнинг очилиш маросимида маданият вазири Озодбек Назарбеков, Қатар маданият вазири Абдулраҳмон бин Ҳамад ал Тани, Қатар ҳукумати вакиллари, маҳаллий аҳоли ҳамда бу ердаги ўзбек диаспораси вакиллари иштирок этишди.
Очилиш маросимида Ўзбекистоннинг ранг-баранг маданий ландшафти, жумладан, мақом ва бахшилик санъати каби номоддий маданий мерос намойиши; Ўзбекистоннинг заргарлик, хаттотлик, миллий мусиқа асбоблари, миниатюра ва бадиий, декоратив ҳамда амалий санъати йўналишларида, шунингдек, гастрономик кўргазмалар ташкил этилди.
Меҳмонлар авлоддан авлодга ўтиб давом этиб келаётган ҳунармандчилик намуналари билан танишди, миллий таомлардан татиб кўриб, ҳунармандлар ва ошпазлар билан суҳбатда бўлди.
Очилиш маросимидан сўнг Ўзбекистон ва Қатар маданият вазирлари қатнашиб, улар ўртасида тет-а-тет мулоқот бўлиб ўтди. Тадбир доирасидаги майдон томошалари, ҳунармандчилик ва гастрономик кўргазма томошасидан сўнг, майдонда ташкил этилган саҳнада ўзбек санъат усталари иштирокида концерт дастури намойиш этилди.
Ўзбекистон маданияти, ҳунармандчилиги ва туризм кунлари билан бир вақтда Доҳа шаҳрида Озарбайжон миллий куни бўлиб ўтмоқда, Қатар томони таклифига кўра Ўзбекистон маданияти, ҳунармандчилиги ва туризм кунларининг расмий очилиш маросимида Озарбайжон президентининг ёрдамчиси Анар Алакбаров, маданият вазири Адил Каримли ва Озарбайжон ҳукумати вакиллари ҳам иштирок этди.
Изоҳ (0)