O‘zbekistonda 2023-yil sarhisobiga ko‘ra, kambag‘allik darajasi 14,1 foizdan 11 foizgacha pasaydi.
Makroiqtisodiy va hududiy tadqiqotlar instituti bosh ilmiy xodimi Nurbek Yo‘ldoshevning fikriga ko‘ra, bunday natija 2023-yilda barqaror iqtisodiy o‘sish bilan bog‘liq va u 2022-yildagiga nisbatan 6 foizni tashkil etgan. Bu davrda inflyatsiya darajasining oshishi nisbatan sekinlashgan.
Shundan kelib chiqib, aholining eng muhim oziq-ovqat mahsulotlariga nisbatan xarid qobiliyati oshishiga erishildi. Aholining umumiy daromadlari 2023-yilda 2022-yildagiga nisbatan 115 foizga oshdi. Aholining umumiy daromadida mehnatdan olinadigan daromadlarning 61,6 foizdan 64 foizga o‘sishi ham aholi kambag‘allik darajasining pasayishiga taʼsir ko‘rsatdi. Tahlil davrida o‘rtacha oylik ish haqi sezilarli darajada, yaʼni 2022-yildagiga nisbatan 117,2 foizga oshib, 4 million 551,4 ming so‘mni tashkil etdi.
“Ushbu tendensiyani deyarli barcha hududlarda va sohalarda kuzatish mumkin. 2023-yilning 1-mayidan boshlab, mehnatga haq to‘lashning eng kam miqdori 920 ming so‘mdan 980 ming so‘mga, 1-dekabrdan boshlab esa 1 050 ming so‘mga oshirildi. Umuman olganda, o‘tgan yil mobaynida ish haqi, pensiya, stipendiya va nafaqalarning miqdori jami 14 foizga oshdi. Biz mavzuni o‘rganish jarayonida O‘zbekiston kambag‘allikni qisqartirish va bandlik vazirligi va Statistika agentligi maʼlumotlaridan foydalandik”, — dedi u.
Qayd etilishicha, aholi bandlik darajasini oshirish, ishsizlikni hal etish masalalari kambag‘allikni qisqartirishning taʼsir omillaridir. Shu nuqtayi nazardan, 2023-yilda 4,1 million kishining bandligi taʼminlandi. Shundan 2,3 million nafari doimiy va mavsumiy ishlarga, 112,8 ming nafari haq to‘lanadigan jamoat ishlariga jalb qilindi. 1,6 million nafari esa o‘zini o‘zi band qilish hisobiga ish bilan taʼminlangan.
“O‘zbekiston-2030” strategiyasiga muvofiq, 2024-yilda kambag‘allik darajasini 10 foizgacha tushirish rejalashtirilgan.
Izoh (0)