Вакцина тақчиллиги шароитида дунёнинг 15 давлатида вабо тез тарқалмоқда. Бу ҳақда Жаҳон соғлиқни сақлаш ташкилоти (ЖССТ) бош директори Тедрос Aданом Гебрейесусга таяниб, “ТАСС” хабар берди.
ЖССТ директори халқаро ҳамжамиятни “тезда ортиб бораётган таҳдид”га жавоб беришга чақирди.
“Йиллар давомида инсониятнинг вабога қарши курашида эришилган ютуқлардан сўнг, ўлимга олиб келадиган касаллик можаролар, қашшоқлик, иқлим инқирози ва глобал ижтимоий-иқтисодий тенгсизлик сабаб 30 мамлакатга қайтди”, — деди ЖССТ раҳбари.
Ташкилот Гаити, Замбия, Зимбабве, Судан ва Эфиопиядаги эпидемиялардан хавотирда. Гебрейесуснинг эслатишича, 2022 йил октябрь ойида вабога қарши вакцина тақчиллиги шароитида икки дозали эмлаш ўрнига бир дозали эмлаш жорий этилган.
“Тегишли чора-тадбирларга қарамай, 2024 йил бошида захиралар йўқ эди. Вакцина 15 мамлакат эпидемиялар ҳақида хабар бераётган бир пайтда тугаб қолди. Бундай вазиятда дунё вабо тез суръатлар билан тарқаётганини тушуниши керак”, — деди Гебрейесус.
У тоза сувдан фойдаланишни таъминлаш ва “атроф-муҳитни ифлослантирмайдиган ҳожатхоналардан фойдаланишга” чақирди. Унга кўра, вабо эпидемиясини тезда аниқлашга қодир эпидемиологик назорат тизими зарур. Вакцина ишлаб чиқаришни ҳам рағбатлантириш ва кўпайтириш керак.
2023 йилда дунёнинг 30 та давлатида 708,2 мингдан ортиқ вабо касаллиги қайд этилган, 4,3 мингдан ортиқ одам вафот этган. Тўққизта давлатда касалланганлар сони 10 мингдан ошган. Ташкилот маълумотларига кўра, 2022 йилда дунёда 472 697 та, 2021 йилда эса 223 370 та вабо касаллиги аниқланган.
Изоҳ (0)