O‘zbekistonda ko‘chmas mulk bozori barqarorligicha qolmoqda. Bu haqda Iqtisodiy tadqiqotlar va islohotlar markazi sharhida maʼlum qilindi.
Maʼlumotlarga ko‘ra, ijara bozorida talab pasayishda davom etmoqda. Mavsumiy pasayish kuzatilayotganiga qaramay, tahlilchilar Uchtepa, Bektemir va Sergeli tumanlarida faollik oshganini qayd etmoqda.
Yanvar oyida O‘zbekistonda qariyb 22 mingta uy-joy sotildi, bu o‘tgan yilning shu davriga nisbatan 20 foizga ko‘p.
Hududiy reyting yetakchilari
Uy-joylar savdosi Xorazm — 75 foiz, Sirdaryo — 51 foiz, Samarqand — 48 foiz va Surxondaryo — 42 foiz viloyatlarida sezilarli darajada oshgani qayd etilgan.
Toshkentda uy-joy ijarasi bozoridagi vaziyat
Toshkentda uy-joy ijara narxlari pasayishda davom etdi. Umuman olganda, yil boshidan buyon poytaxtda o‘rtacha ijara narxi 2,2 foizga pasaydi va 1 kv m uchun 9 dollarni tashkil etdi. Eʼtiborlisi, Uchtepa, Bektemir va Sergeli tumanlarida ijara haqi mos ravishda 3,4 foiz, 2,1 foiz va 1,1 foizga qimmatlashgani qayd etildi.
Shayxontohur va Mirzo-Ulug‘bek tumanlarida ijara haqi sezilarli darajada pasaygan, bu hududlarda ijara narxi 5 foizdan ko‘proqqa arzonlashgan. Shayxontohur, Yakkasaroy va Mirobod tumanlarida narxlar biroz pasayganiga qaramay, bu yerda eng yuqori narxlar saqlanib qolmoqda, uy-joyni ijaraga olish har kv m uchun o‘rtacha 11 dollarni tashkil etadi.
Nisbatan arzon ijara narxlari Uchtepa, Sergeli va Bektemir tumanlarida 1 kv m uchun 6 dollardan 8 dollargacha qayd etildi.
Ikkilamchi bozorda narx parametrlari
Yil boshidan beri ikkilamchi uy-joy bozori 1,6 foizga o‘sdi. Yillik hisobda ikkilamchi bozor 18 foizga oshdi. Eng sezilarli o‘sish Xorazm, Toshkent va Andijon viloyatlarida o‘tgan yilning yanvar oyiga nisbatan o‘rtacha 30 foizga o‘sish kuzatildi.
Yanvar oyida Toshkent shahrida ikkilamchi uy-joylarning o‘rtacha narxi deyarli o‘zgarmadi va bir kv m uchun 1 122 dollarni tashkil etdi. Bektemir, Sergeli va Yashnobod tumanlarida narxlar biroz sezilarli darajada oshgani qayd etildi.
O‘tgan yilning yanvar oyiga nisbatan poytaxtda ikkilamchi bozorning o‘rtacha narxi deyarli 20 foizga oshdi.
Izoh (0)