O‘zbekistonda 2024–2025-yillarda ikki million ayol bandligini taʼminlash choralari ko‘rilishi maʼlum qilindi.
AOKAda o‘tkazilgan brifingda “O‘zbekipaksanoati” uyushmasi axborot xizmati rahbari Muzaffar Muhammadjonov davlat rahbari tomonidan o‘tkazilgan videoselektor yig‘ilishida pillachilik tarmog‘iga belgilab berilgan vazifalar yuzasidan maʼlumot berdi. Bu ko‘rsatkich “lider agronom ayol” va ular armiyasi (136 ming nafar), “xonadonda sanoat” (65,1 ming nafar), “Bir usta 10 ta shogird” (8360 nafar) kabi yangi tizimlar yo‘lga qo‘yilishi, mavjud va yangi sanoat korxonalari (34,5 ming nafar), pilla parvarishidagi kasanachi ayol va fermer aʼzolari (birinchi yilda 884 ming nafar) hisobiga taʼminlanadi.
Qolaversa, 2024–2025-yillarda umumiy qiymati 255 million dollarlik 142 ta loyiha amalga oshirilishi va qo‘shimcha 15,2 mingta ish o‘rinlari yaratilishi taʼminlanadi. 2024-yilda yetarli urug‘ bilan taʼminlash maqsadida 5 ta sanoat urug‘i (Buxoro, Namangan, Samarqand, Andijon, Sirdaryo) ishlab chiqaruvchi (yillik quvvati — 180 ming quti) va 2 ta naslli urug‘ zavodini ishga tushirish hisobiga ipak qurti urug‘iga bo‘lgan ehtiyojning 100 foiz qoplanishiga erishiladi.
Seryomg‘ir, tog‘oldi 20 ta tumanda ko‘p mavsumli pilla yetishtirishni yo‘lga qo‘yish rejalashtirilmoqda. 2024-yilda sinov tariqasida ushbu tumanlarda tajriba sifatida 60 gektar yer maydonlariga plantatsiya shaklida, 6600 ta xonadonlar tomorqalariga jami 20 gektar “o‘rma” tutzorlar tashkil etiladi.
Izoh (0)