Deputat Jahongir Jiyanov “Soyadagi siyosatchilar” Telegram kanalida Andijon shahar obodonlashtirish boshqarmasi tomonidan dekorativ o‘simliklar qalamchalari “Cherenki dekorativnix rasteniy” ko‘chatlarining 1 donasini salkam 700 million so‘mdan sotib olingani haqida xabar bergan edi.
Unda aytilishicha,
- Dekorativ o‘simliklar qalamchalari “Cherenki dekorativnix rasteniy” ko‘chatlarining 1 donasi 598 million 700 ming so‘mdan “YTT Taxirov Abdulvoxid Vasilovich”dan sotib olingan.
- Dekorativ o‘simliklar qalamchalari “Cherenki dekorativnix rasteniy” ko‘chatlarining 1 donasi 698 million 650 ming so‘mdan “YTT Nasirdinova Muxayyoxon Odiljon qizi”dan sotib olingan.
- Dekorativ o‘simliklar qalamchalari “Cherenki dekorativnix rasteniy” ko‘chatlarining 1 (bir) donasi 698 million 700 ming so‘mdan “Gullar va landshaft” MCHJdan sotib olingan.
“Deputat so‘rovimizga Andijon shahar obodonlashtirish boshqarmasi tomonidan 2023-yilda ekilgan manzarali va igna bargli daraxtlar to‘g‘risida taqdim etilgan ma’lumotda bor yo‘g‘i 99,855,000 so‘mlik daraxtlar ekilganini iddao qilgan edi.
Afsuski, Andijon shahar obodonlashtirish boshqarmasi tomonidan 2023-yilda ekilgan manzarali va igna bargli daraxtlar to‘g‘risida taqdim etilgan ma’lumotlarda yuqoridagi dekorativ o‘simliklar qalamchalari “Cherenki dekorativnix rasteniy” ko‘chatlari to‘g‘risida ma’lumot keltirilmagan.
Xullas, bitta tashkilot davlat byudjeti mablag‘laridan 3 (uch) dona qalamchalarni 2 mlrd so‘mga sotib olsa-ya. Qalam emas, qalamcha. Bu pulga o‘rmoncha sotib olsa bo‘lsa kerak”, — deydi deputat.
Mazkur holat yuzasidan Andijon shahar hokimligi matbuot xizmati munosabat bildirdi.
Unda aytilishicha, shahar obodonlashtirish boshqarmasi tomonidan manzarali va igna bargli daraxtlar hamda mavsumiy gullar sotib olish maqsadida davlat xaridlari elektron tizimi orqali (etender.uzex.uz) ochiq tanlov e’lon qilingan. Tanlovda g‘olib deb topilgan “YTT Taxirov Abdulvoxid” hamda “Gullar landshaft” MCHJlar bilan shartnoma tuzilgan.
“YTT Taxirov Abdulvoxid” hamda “Gullar landshaft” MCHJ tomonidan 1 milliard 996 million 50 ming so‘mlik 83 xil turdagi jami 5 ming 235 ta manzarali va igna bargli daraxtlar hamda mavsumiy gullar yetkazib berilgan.
Obodonlashtirish boshqarmasi tomonidan ushbu yetkazib berilgan manzarali va igna bargli daraxtlar hamda mavsumiy gullar shaharning markaziy ko‘chalari, maydonlarga ekilgan.
Andijon shahar hokimligi deputat Jahongir Jiyanov sanab o‘tgan “YTT Nasirdinova Muxayyoxon Odiljon qizi”dan 698 million so‘mlik xarid haqida va 2023-yil yakunlari bo‘yicha deputatlik so‘roviga javob tariqasida berilgan ma’lumotda “Cherenki dekorativnix rasteniy” ko‘chatlari to‘g‘risida hech narsa aytilmagani yuzasidan tushuntirish bermagan.
Izoh (0)