Papua-Yangi Gvineyaning Enga provinsiyasida qabilalararo to‘qnashuvlar oqibatida 64 kishi halok bo‘ldi. Bu haqda mahalliy Papua New Guinea Post Courier nashri xabar berdi.
Politsiyaga ko‘ra, 19-fevral kuni qabilalar o‘rtasidagi qurolli to‘qnashuv natijasida halok bo‘lganlarning yana 11 jasadi topilgan. Bungacha 53 kishining halok bo‘lgani aniqlangan. Politsiya Engadagi to‘qnashuvlar “ambulin va sikin qabilalari hamda ularning ittifoqchilari o‘rtasida davom etayotgan kurash” ekanini ta’kidlamoqda.
“Qurolli to‘qnashuv 18-fevral, yakshanba kuni mahalliy vaqt bilan 16:00 atrofida boshlangan. Ishtirokchilar o‘qotar qurollardan: SLR, AK-47, M4, AR-15, M16 miltiqlari, shuningdek, ov miltiqlari va qo‘lda yasalgan o‘qotar qurollardan foydalangan”, — dedi provinsiyadagi politsiya komissari yordamchisi Samson Kua.
Voqea joyida halok bo‘lganlar va yaradorlarni qidirish bo‘yicha operatsiya davom etmoqda. Yaradorlar soni hozircha ma’lum qilinmagan.
Izoh (0)