OpenAI kompaniyasi matnlar asosida videolar yaratib beruvchi Sora sun’iy intellekt modeli yaratilganini e’lon qildi.
Sora matnli ko‘rsatmalar va statik tasvirlar asosida fotorealistik videolar yaratadi va mavjud videolarni kadrlar bilan to‘ldira oladi. Yaratilgan videolarning maksimal davomiyligi bir daqiqani tashkil qiladi. Videolarda nafaqat odamlar va hayvonlarning real ko‘rinishlari, balki fantastik sahnalar ham, masalan, havoda suzayotgan kitlar aks etishi mumkin.
Shu bilan birga, kompaniya murakkab sahnalardagi harakatlarni aniq modellashtirishda Sora qiyinchiliklar va xatolarga duch kelishi mumkinligidan ogohlantirdi. Hozirda Sora sinov bosqichida va faqat cheklangan doiradagi rassomlar, dizaynerlar va rejissyorlar undan foydalana oladi.
“Sun’iy intellektni sinovdan o‘tkazayotganlar o‘z fikr va mulohazalarini bildirishlari kerak”, — deydi kompaniya.
Sora omma uchun foydalanishga qachondan ochiq bo‘lishi noma’lum. OpenAI sun’iy intellektdan foydalanishda xavfsizlik va etikaga e’tibor qaratib, soxta kontentni aniqlash funksiyalar ustida ishlamoqda.
Izoh (0)