Қозоғистоннинг Ақмўла вилоятида автобус бузилиши оқибатида йўлда қолиб кетган Ўзбекистон фуқаролари эвакуация қилингани ҳақида хабар берилган эди. Ўзбекистоннинг Қозоғистондаги элчихонаси вазият назоратга олинганини маълум қилди.
15 февраль куни Остона—Челябинск йўналишида ҳаракатланаётган йўловчи автобуси Жақси—Есил—Бузилиқ йўлидаги Жақси қишлоғи яқинида бузилиб қолганди.
Ақмўла вилоят Фавқулодда вазиятлар департаменти берган хабарда эвакуация қилинган ўзбекисонликлар сони 64 нафар шундан 17 нафари болалар экани келтирилганди. Элчихона берган маълумотга кўра, жами эвакуация қилинган 64 кишининг 27 нафари ўзбекистонлик бўлган. Шундан 12 нафари болалар.
Уларнинг барчаси Жақси қишлоғидаги мактабда жойлашган исиниш жойига олиб борилиб, иссиқ овқат билан таъминланган. Йўловчилар тиббий ёрдамга муҳтож бўлмаган.
Элчихона вазият назоратга олинганини, Ақмола вилояти ҳокимлиги, полиция ва Фавқулодда вазиятлар бошқармалари билан алоқада эканини билдирди.
Шу билан бирга, об-ҳаво шароити ёмонлашгани сабабли Қозоғистоннинг 11 вилоятида республика аҳамиятига молик йўлларнинг 46 та участкасида автотранспорт воситалари ҳаракатига чеклов киритилганини, ҳаво ҳарорати 30-35 даража совуққача пасайиши кутилаётганини маълум қилди.
Шу муносабат билан элчихона Ўзбекистон фуқароларидан ноқулай об-ҳаво шароитида сафарга чиқмасликларини сўради.
Изоҳ (0)