Davlat xavfsizlik xizmati xodimlari tomonidan o‘tkazilgan tezkor tadbirlar davomida farzandlarini sotishga uringan ayollar qo‘lga olindi.
Xususan, Guliston shahrida o‘tkazilgan tezkor tadbirda Buxoro viloyatida tug‘ilgan, Guliston shahrida vaqtincha yashovchi 33 yoshli ayol 30-yanvar kuni tug‘ilgan o‘g‘il farzandini 40 ming dollarga sotgan vaqtida ashyoviy dalillar bilan ushlangan.
Termiz tumanida yashovchi 31 yoshli ayol 25-yanvar kuni tug‘ilgan qiz farzandini o‘zining jinoiy sherigi bo‘lgan ayol bilan til biriktirib, Termiz shahrida 25 million so‘mga sotgan vaqtida ushlangan.
Shuningdek, Chirchiq shahrida yashovchi 27 yoshli ayol o‘zining 2018-yilda tug‘ilgan o‘g‘lini Toshkent shahrida 3 ming dollarga sotgan vaqtida ashyoviy dalillar bilan qo‘lga olingan.
Namangan shahrida yashovchi 29 yoshli ayol o‘zining 2014-yilda tug‘ilgan o‘g‘lini 18 ming dollarga sotishga kelishib, talab qilingan puldan 4 ming dollarini olgan vaqtida ushlangan.
Mazkur shaxslarga nisbatan Jinoyat kodeksining 135-moddasi (odam savdosi) bilan jinoyat ishlari qo‘zg‘atilgan.
Bundan oldin Toshkent viloyatida bir yoshli o‘g‘lini 9 ming dollarga sotishga uringan er-xotinga sud hukmi o‘qilgani, Samarqandda ayol uy olish uchun 6 yoshli o‘g‘lini 6 ming dollarga sotmoqchi bo‘lganida qo‘lga olingani hamda Navoiyda farzandini 85 million so‘mga sotishga uringan er-xotin jinoyat ustida qo‘lga olingani haqida xabar berilgandi.
Izoh (0)