Наманганда 10 ёшли ўғлини 18 минг долларга сотишга уринган аёл ушланди (видео)

Давлат хавфсизлик хизмати ходимлари томонидан ўтказилган тезкор тадбирлар давомида фарзандларини сотишга уринган аёллар қўлга олинди.

Хусусан, Гулистон шаҳрида ўтказилган тезкор тадбирда Бухоро вилоятида туғилган, Гулистон шаҳрида вақтинча яшовчи 33 ёшли аёл 30 январь куни туғилган ўғил фарзандини 40 минг долларга сотган вақтида ашёвий далиллар билан ушланган.

Термиз туманида яшовчи 31 ёшли аёл 25 январь куни туғилган қиз фарзандини ўзининг жиноий шериги бўлган аёл билан тил бириктириб, Термиз шаҳрида 25 миллион сўмга сотган вақтида ушланган.

Шунингдек, Чирчиқ шаҳрида яшовчи 27 ёшли аёл ўзининг 2018 йилда туғилган ўғлини Тошкент шаҳрида 3 минг долларга сотган вақтида ашёвий далиллар билан қўлга олинган.

Наманган шаҳрида яшовчи 29 ёшли аёл ўзининг 2014 йилда туғилган ўғлини 18 минг долларга сотишга келишиб, талаб қилинган пулдан 4 минг долларини олган вақтида ушланган.

Мазкур шахсларга нисбатан Жиноят кодексининг 135-моддаси (одам савдоси) билан жиноят ишлари қўзғатилган.

Бундан олдин Тошкент вилоятида бир ёшли ўғлини 9 минг долларга сотишга уринган эр-хотинга суд ҳукми ўқилгани, Самарқандда аёл уй олиш учун 6 ёшли ўғлини 6 минг долларга сотмоқчи бўлганида қўлга олингани ҳамда Навоийда фарзандини 85 миллион сўмга сотишга уринган эр-хотин жиноят устида қўлга олингани ҳақида хабар берилганди.