Namangandagi “Markaziy” o‘yingohida “Navbahor” va Saudiya Arabistonining “Al-Ittihod” jamoalarining o‘yinoldi rasmiy mashg‘uloti hamda bosh murabbiylar ishtirokidagi matbuot anjumani bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Matbuot anjumanini dastlab “Navbahor” klubi bosh murabbiyi Samvel Babayan boshlab berdi. Uning aytishicha, bundan bir yil avval ham Osiyoning eng zabardast jamoalari Namanganda to‘p surishi haqida faqat orzu qilish mumkin edi. Bugungi kunga kelib esa ushbu orzu-niyatlar reallikka aylandi. “Al-Ittihod” bilan o‘yinda esa futbolchilar nafaqat klub yoki Namanganni, balki butun mamlakatni tamsil etadi.
“Raqib jamoani alohida tanishtirishning hojati yo‘q, munosib tarixi va yulduzli tarkibiga ega jamoa. Qaysidir ma’noda hozirgi paytda bizdan ustun taraflari ham bor, chunki klub Saudiya Arabistoni chempionatida ikkita rasmiy o‘yin o‘tkazishga ham ulgurdi”, — deydi Babayan.
Jurnalistlarning Osiyo chempionatidan so‘ng darvozabon O‘tkir Yusupovning ruhiy va jismoniy holati haqida savoliga Babayan quyidagicha javob berdi:
“Agar Qatar bilan bo‘lgan o‘yindagi vaziyatni nazarda tutayotgan bo‘lsangiz, u yerda rikoshet bo‘lgandi. Buni kimdir ko‘rdi, kimdir payqamadi. Aslida O‘tkir to‘g‘ri pozisiyada turgandi. Qolaversa, o‘sha o‘yinning o‘zida ikkita penaltini qaytardi. O‘tkir top darajadagi, jamoa yetakchisi bo‘lgan va shunday bo‘lib qoladi. Uning hozirgi jismoniy holati va kayfiyati ham a’lo darajada”, — dedi “Navbahor” bosh murabbiyi.
“Al-Ittihod”ning asosiy yulduzi Namanganga kelmayotgani “Navbahor” uchun omad bo‘ldimi degan savolga javoban Babayan quyidagilarni bildirdi:
“Neymar, Benzema kabi dunyo tanigan yulduzlarning Namanganga kelishi aslida katta hodisa, futbol targ‘iboti, ular kelgan shahar dovrug‘i uchun ajoyib imkoniyat bo‘lardi, bunday bo‘lmaganidan biz faqat afsusdamiz. Shunisi ham borki, yodingizda bo‘lsa, Neymar ishtirokidagi o‘yinda biz durang o‘ynagandik, u qatnashmagan bahsda esa biz yutqazdik. Bundan qanday xulosa chiqarish o‘zingizga havola”, — dedi Samvel Babayan.
“Al-Ittihod” bosh murabbiyi Marselo Galyardo bugungi o‘yin klub uchun oson kechmasligini ta’kidlab o‘tdi.
“Ikki jamoa ham mavsumni endi boshlamoqda. Bizni jamoada FIFA kunlaridan endi qaytgan futbolchilar bor. Qolaversa, biroz sovuq ob-havo, maydonning ideal holatda emasligi ham bizga pand berib qo‘yishi mumkin. Ammo biz g‘alaba qozonish va muxlislarimizni mamnun etish uchun maydonga tushamiz”, — dedi Galyardo.
Karim Benzema Namanganga kelmaganiga izoh berar ekan, Galyardo u hozir individual tarzda mashg‘ulotlar o‘tkazayotganini ma'lum qildi.
“Benzemaning holati yaxshi, kelgusi haftalardan jamoaviy mashg‘ulotlarga chiqishni boshlashini kutyapmiz. Uning ushbu o‘yinga kelmasligi murabbiylar shtabining qarori, chunki tayyorgarlik darajasi bo‘yicha aniq tasavvurga ega emasmiz”, — dedi Galyardo.
Argentinalik mutaxassis Qatarda bo‘lib o‘tgan Osiyo Kubogida o‘zining o‘yinchilari qatori O‘zbekiston terma jamoasi, jamoa safidagi “Navbahor” futbolchilari harakatlarini kuzatish imkoniyatiga ega bo‘lgani, ular yaxshi taassurot qolirganini qayd etib o‘tdi.
Izoh (0)