Намангандаги “Марказий” ўйингоҳида “Навбаҳор” ва Саудия Арабистонининг “Ал-Иттиҳод” жамоаларининг ўйинолди расмий машғулоти ҳамда бош мураббийлар иштирокидаги матбуот анжумани бўлиб ўтди. Бу ҳақда “Дарё” мухбири Азизбек Абдувалиев хабар бермоқда.
Матбуот анжуманини дастлаб “Навбаҳор” клуби бош мураббийи Самвел Бабаян бошлаб берди. Унинг айтишича, бундан бир йил аввал ҳам Осиёнинг энг забардаст жамоалари Наманганда тўп суриши ҳақида фақат орзу қилиш мумкин эди. Бугунги кунга келиб эса ушбу орзу-ниятлар реалликка айланди. “Ал-Иттиҳод” билан ўйинда эса футболчилар нафақат клуб ёки Наманганни, балки бутун мамлакатни тамсил этади.
“Рақиб жамоани алоҳида таништиришнинг ҳожати йўқ, муносиб тарихи ва юлдузли таркибига эга жамоа. Қайсидир маънода ҳозирги пайтда биздан устун тарафлари ҳам бор, чунки клуб Саудия Арабистони чемпионатида иккита расмий ўйин ўтказишга ҳам улгурди”, — дейди Бабаян.
Журналистларнинг Осиё чемпионатидан сўнг дарвозабон Ўткир Юсуповнинг руҳий ва жисмоний ҳолати ҳақида саволига Бабаян қуйидагича жавоб берди:
“Агар Қатар билан бўлган ўйиндаги вазиятни назарда тутаётган бўлсангиз, у ерда рикошет бўлганди. Буни кимдир кўрди, кимдир пайқамади. Аслида Ўткир тўғри позисияда турганди. Қолаверса, ўша ўйиннинг ўзида иккита пенальтини қайтарди. Ўткир топ даражадаги, жамоа етакчиси бўлган ва шундай бўлиб қолади. Унинг ҳозирги жисмоний ҳолати ва кайфияти ҳам аъло даражада”, — деди “Навбаҳор” бош мураббийи.
“Ал-Иттиҳод”нинг асосий юлдузи Наманганга келмаётгани “Навбаҳор” учун омад бўлдими деган саволга жавобан Бабаян қуйидагиларни билдирди:
“Неймар, Бензема каби дунё таниган юлдузларнинг Наманганга келиши аслида катта ҳодиса, футбол тарғиботи, улар келган шаҳар довруғи учун ажойиб имконият бўларди, бундай бўлмаганидан биз фақат афсусдамиз. Шуниси ҳам борки, ёдингизда бўлса, Неймар иштирокидаги ўйинда биз дуранг ўйнагандик, у қатнашмаган баҳсда эса биз ютқаздик. Бундан қандай хулоса чиқариш ўзингизга ҳавола”, — деди Самвел Бабаян.
“Ал-Иттиҳод” бош мураббийи Марсело Галярдо бугунги ўйин клуб учун осон кечмаслигини таъкидлаб ўтди.
“Икки жамоа ҳам мавсумни энди бошламоқда. Бизни жамоада ФИФА кунларидан энди қайтган футболчилар бор. Қолаверса, бир оз совуқ об-ҳаво, майдоннинг идеал ҳолатда эмаслиги ҳам бизга панд бериб қўйиши мумкин. Аммо биз ғалаба қозониш ва мухлисларимизни мамнун этиш учун майдонга тушамиз”, — деди Галярдо.
Карим Бензема Наманганга келмаганига изоҳ берар экан, Галярдо у ҳозир индивидуал тарзда машғулотлар ўтказаётганини маълум қилди.
“Бенземанинг ҳолати яхши, келгуси ҳафталардан жамоавий машғулотларга чиқишни бошлашини кутяпмиз. Унинг ушбу ўйинга келмаслиги мураббийлар штабининг қарори, чунки тайёргарлик даражаси бўйича аниқ тасаввурга эга эмасмиз”, — деди Галярдо.
Аргентиналик мутахассис Қатарда бўлиб ўтган Осиё Кубогида ўзининг ўйинчилари қатори Ўзбекистон терма жамоаси, жамоа сафидаги “Навбаҳор” футболчилари ҳаракатларини кузатиш имкониятига эга бўлгани, улар яхши таассурот қолирганини қайд этиб ўтди.
Изоҳ (0)