Латвия Конституциявий суди латиш тилидан ўз вақтида имтиҳондан ўтмаган Россия фуқаролари — республикада доимий яшаш жойига эга бўлганларни депортация қилиш тўғрисидаги қарорни қонуний деб тан олди. Бу ҳақда Delfi портали хабар берди.
Унинг сўзларига кўра, суд ҳокимият талабларини бажариш учун ажратилган икки йиллик муддатни етарли деб ҳисоблаган. Шу билан бирга, депортация “Латвияда ўз ҳуқуқий мақомини сақлаб қолиш учун ҳеч қандай ҳаракат қилмаган” ва республика билан алоқаларни мустаҳкамлашга “ҳеч қандай қизиқиш кўрсатмаган” русларга нисбатан адекват чора деб аталди.
Суд депортация тўғрисидаги қарор жамоавий эмас, балки алоҳида шахсларга нисбатан қўлланишини таъкидлади. Порталнинг қайд этишича, бундай чоралар “давлат хавфсизлигини таъминлаш” учун зарур.
2022 йил сентябрь ойида Латвия Сейми (бир палатали парламент) миграция қонунчилигига ўзгартиришлар киритиб, Болтиқбўйи республикасида доимий яшаш жойига эга бўлган Россия фуқаролари 2023 йил 1 сентябргача А2 даражасида латиш тилини билиш сертификатини олишлари шартлигини белгилаб қўйганди. Акс ҳолда, уларнинг ҳужжатлари бекор қилиниши ҳақида огоҳлантирилган.
14 сентябрь куни Латвия парламенти иммиграция қонунчилигига республикада доимий яшаш ҳуқуқини олиш учун давлат тили имтиҳонидан ўтиш муддатини икки йилга узайтирувчи тузатишларни якуний ўқишда маъқуллади. Энди Латвияда яшовчи Россия фуқаролари икки йил муддатга вақтинчалик яшаш учун рухсатнома олишлари мумкин бўлади, бу вақт ичида улар давлат тилидан имтиҳон топширишлари керак.
Яшаш учун рухсатнома олишга ариза 2023 йил 31 декабргача топширилиши керак эди. Кечиктириш фақат 2023 йил сентябрь ойининг бошигача имтиҳон топшириш учун рўйхатдан ўтганларга таъсир қилади, тестдан ўта олмаганларга эса уни қайта топшириш имконияти берилади. Имтиҳон топширишдан фақат 75 ёшдан ошган шахслар озод қилинади.
Изоҳ (0)